Dos evenimyentos en el Museo Djudio

Silvyo OVADYA Köşe Yazısı
22 Mayıs 2019 Çarşamba

Kuando empesi a eskrivir en el Şalom, la defonda Klara Perahya estava segura ke devia de eskrivir artikolos politikos. I su punto de vista era ke kalia artikolos politikos en Judeo-Espanyol en el semanaryo Şalom mizmo en Judeo-Espanyol. I reelmente en el empesijo estava eskrivyendo syertos artikolos asemejantes. Ma despues todo troko en el mundo i un alay de lokos se izyeron prezidentes o primer ministros en los payizes los mas importantes. Se echan i alevantandosen eskriven un twit, i todo troka en el mundo. Dize ke kere sinkuenta por syen mas muncho de dasyo en las duanas i ensupito todo se troka en el mundo entero. Kuando no les plazen los rezultados de las eleksyones syertos politikos topan un punto para renovar las eleksyones. Vyendo todo esto oy en diya es mas sano de eskrivir syertos artikolos sovre la kultura.

 No se si lo savesh; en muestra komunidad, ay un grupo ke organiza un evenimyento i el nombre es: “Ven i mos konoseremos” (Gelin tanış olalım). Es una aktividad ke se realisa en las universidades o en diferentes lugares ande el puevlo ke no es djudyo puede topar repuesta a todas las kestyones ke pensa sovre la relijion Djudia, sovre los Djudios i sovre la vida de los Djudios en muestro pais o en el mundo entero. I kada persona de esta aktividad es nomado “Un livro Djudio”. Realizan esta aktivitad kon tres o kuatro personas. Mizmo una vez me demandaron si puediya ir a la Universitad Teknika d’Estanbol? I me fui, ma este diya malorozamente una partida de los estudyantes teniyan syertos egzamenes i durante dos oras solo dos personas me demandaron unas kuantas bavajadas. Diya de alhad no fue la mizma koza! Organizaron el evenimyento entre 13.30 i 15.00. Una ora i media. I mas de ochenta personas vinyeron para demandar diferentes kozas sovre el Djudaismo. Reelmente fue una aktivitad muy reushida. Para ke la djente no asperen muncho tyempo, syertas personas ke son kapaches de responder ayudaron el ekipo ke lavora sovre este sujeto. Espero ke esta aktivitad se va repetar en serka tyempo.

 Despues de la Primera Gerra Mondial una grande partida del Imperio Otomano fue okupado por syertos payizes. I empeso la Gerra de Independensya. A la fin kuando se dyo karar de fondar la Republika Turka, empeso el Tratado de Lozan ande dyeron karar de embiyar los muzulmanos de Trakya a las tyerras turkas i los gregos ke biviyan en Anatolia (ma no los ke bivian en Estanbol) a la Gresia. I este modo mas de dos milyones de personas fueron arankados de sus tyerras i de sus payises. En Gresia se topa una asosiasion ke lavora sovre los rekuerdos de los gregos ke vinyeron de las tyerras turkas. I esta asosyasyon se yama “Sentro de Bushkidades de la Chika Asia” (Küçük Asya Araştırmaları Merkezi). I en Turkiya ay una fondasion ke se yama “Los ke trokaron de payis kon el Tratado de Lozan” (Lozan Mübadilleri Vakfı). Esta fondasion tyene un koro ke es renomada i diya de alhad dyeron un konserto en la Sinagoga de Neve Şalom por el Muzeo Djudio. Antes del konsyerto, muestro amigo Dani Altaras me disho “No te merikiyes, ay muncha djente ke son enteresados kon la muzika de este grupo. De una parte eyos, de la otra parte mozotros Nisya, Teri, Emel del muzeo, kon el ayudo de Izak, el prezidente de la komunidad pasaron la semana en dando haber kon twites i otras kozas al mundo entero. I diya de Alhad topimos serka de kuatroshentas personas en la Sinagoga de Neve Şalom i la mas grande partida no eran miembros de muestra komunidad. Fue un konsyerto muy reushido. Envitaron a Buket Bahar para ke kante unas kuantas kantikas en Judeo-Espanyol. Avlimos ke el konserto no deve de turar mas de una ora. Mos disheron una ora i kinze puntos. El konsyerto ke empeso a las tres topo fin serka las sinko. El mas emportante era ke la djente estavan kontentes en saliendo. I mozotros estavamos mas kontentes de eyos vyendo estas dos aktivitades i tanta djente en muestro edifisyo.

 

 

Siz de yorumunuzu yapın

Tüm Yorumları Görün