Bear – Behukotay

Rav Yeuda ADONİ Köşe Yazısı
22 Mayıs 2019 Çarşamba

I avlo el Kriyador a Moshe en el monte de Sinay dizyendo: Avla a los ijos de Israel i diles: kuando vineresh a la tyerra ke yo vos dare, algara la tyerra Shabat a el Todo Poderozo. Sesh anyos sembraras tu kampo i sesh anyos apodaras tu vinya i akojeras tu renuevo. En el anyo seteno avra Shabat de olgansa a la tyera. Shabat a el Kriyador, tu sembres tu kampo i apodes tu vinya. El Shabat de la tyerra vos sera para komer, a ti i tu syervo i a tu syerva i a tu kuatropea, i a la bestya ke uvyere en tu tyerra.

El eskopo de todas las enkomendansas es de azermos akodrar ke somos ovligados de ovedeser i afirmar las dichas de el Kriyador. En ovedesyendo la persona las enkomendansas de el Kriyador, por myentes, ke el Santo Bendicho El podesta sovre el mundo entero, el ombre deve de saver, ke el patron de este mundo es el Kriyador de el mundo. En la abondansa no devemos de olvidarmos, la abondansa de onde nos vino? En afirmando los fueros i los djuisyos, damos loores a el Kriyador ke nos rengrasyo kon muncho Bueno.

Kuando el sinyor de el mundo nos da un kanpo, devemos de azerlo i sembrarlo komo esta dicho en la Tora. En arekojendo el produkto, de la tyerra devemos de deshar los bodres de el kanpo para lo menesterozos; lo ke se olvido en el kanpo mas no apartyene a el, sino para los menesterozos, no deve de tornar a tomarlo. No deve de olvidarse de aregalar a el Koen, a el Levi para ke tenga la bendisyon de Dyos.

La perasha nos enbeza todo lo ke es de menester de azer, para ke tengamos el merito de alkansar a la bendisyon de el Kriyador, bendicho sea su nombre.

 

Siz de yorumunuzu yapın

Tüm Yorumları Görün