kanada REklam

Tuvyeron konfiensya en los Turkos

Tuvyeron konfiensya  en los Turkos

Era diya de alhad. En el famozo Club “Cercle d’Orient” avia un filmo i una konferensia. Un ambasador retirado ke fue ambasador en Espanya i en la Union Evropea esta lavorando para kreer un muzeo. No se el nombre. Ma esto esperando ke el nombre no va ser “Muzeo de Tolerensia”. En muestro muzeo teniyamos el konserto del grupo de los “Djovenes Retirados” (Genç Emekliler); i malgarado este evenimyento deshi todo i me fui a esta konferensia para tomar la palavra si avia de menester. El sinyor Ender Arat eskrivyo un livro intitulado “Tuvyeron Konfiensya en los Turkos”. En este livro esta tratando de las buendades ke los Turkos izyeron en la istoria. Los puevlos ke ayudaron; empesando de los Djudios Sefardim ke fueron ekspulsados de la Espanya i del Portugal, de los Polonezos ke fondaron el kazal de Polonezköy en Estanbol, los Rusos ke yegaron despues de la revolusyon; los Kurdes ke se fuyeron de Irak i munchas personalidades ke toparon abrigo en la Turkiya eskapando kon los tres milyones de Sirianos ke fueron achetados estos anyos dalkavo. No devo de olvidarme de los profesores Alemanes ke vinieron a Turkiya kon la invitasyon de Atatürk. I reelmente para este sujeto ay un konflikto muy emportante. Syertas personas i siantifikos eskriven ke estos profesores fueron elijidos por una delegasyon. No eskojeron profesores ke no les servia. La vedra es ke no izyeron hatir. Ma syertos estan eskrivyendo ke la Turkiya izo una grande buendad en achetandolos. Kale prezentar esto kon todas las frontes (cephe).

 Era la tresera seduta sovre este sujeto. La aktividad kultural empeso kon el filmo del produktor Mehmet Polat ke lavoro por la firma “32. Gün”  ke era renomado por su presentator Mehmet Ali Birand. El nombre del filmo es “Açık Kapı Yahudiler/Puerta Avyerta los Djudios”. En el filmo vemos lo ke pensan los Djudios de muestra komunidad. El redaktor del Şalom Ivo Molinas, la redaktrisa del Dergi Nana Tarablus, la artista Eti Koen, la pianista Renan Koen, Yusuf Altıntaş del Grande Rabinato, el Hahambaşı İzak Haleva, el fotografo Alberto Modiano, el famozo eskrivano Maryo Levi i munchas otras personas partajaron sus ideas sovre sus egzistensya en la Turkiya.

 Doepues ke vimos el filmo mos ambezimos ke el sinyor Ender Arat esta lavorando para pueder krear un muzeo para anunsyar al mundo todo lo ke izo la Turkiya para la umanidad i para salvar las personas en perikolo. Es djusto ke izyeron munchas kozas para ayudar las personas. Ma kreo ke kale anunsiar esto al mundo muy modestamente i en kontando toda la verdad sin guadrar las kozas ke no eran makbul.

 Este muzeo se va avrir en kurto tyempo. Dyeron karar ke se va avrir en Estanbol, mizmo en Pera/Beyoğlu. A la fin de la konferensia tomi la palavra. En primero respondi para la nasyonalidad Espanyola. A la majoridad de la djente les paresyo ke todos los ke tomaron la nasyonalidad Espanyola, unos kuantos diyas despues se fueron a Espanya. I estavan demando kuantas personas tomaron esta nasyonalidad. Les respondi dizyendo ke no es solo la Espanya i el Portugal ke estan dando la nasyonalidad a los ke estan apruvando ke tyenen un pasado Espanyol. I no kale ke sean mizmo Djudios. Mas de sinko mil personas tomaron la nasyonalidad Espanyola o Portugesa ma kreo ke no ay mas de 50 personas ke se enstalaron en Espanya o en Portugal. I les dishe ay munchos muzulmanos ke estan buchkando raises djudias en sus avuelos para pueder tomar la nasyonalidad Espanyola. I si tenesh un pasado asemejante es el Gran Rabinato ke esta dando un papel para pueder apruvar.

 I despues les dishe ke va ser un problem para mi si el nombre del muzeo va ser “Museo de Tolerensia / Hoşgörü Müzesi” porke yo no so mas manko Turko ke vozotros i si metesh un nombre asemejante va achetar ke so un sivdadino de segunda klasa. I esto me va ferir muncho. Reelmente la grande majoritad de los partisipantes ke eran miembros muzulmanos del Club me dyeron razon i kreo ke estos biervos fueron muy emportantes para detener el nombre ke pensavan…

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın