PESAH : La Salidura del Ejipto

Rav Yeuda ADONİ Köşe Yazısı
17 Nisan 2019 Çarşamba

En la medya noche del 15 de Nisan, mando a dizir Paro a todo el puevlo djudyo ke se topavan en la tyera de Goshen ke eyos eran liberos, i ke puedian salir de su pais i al punto los djudyos ke ya estavan prontos esperando esta ora, se rekojeron. Todos kon prisa en el kartier Ramses, i a la manyana, en el kinze Nisan salyeron todos los djudyos de el Ejipto kon grande koraje i alegriya despues de aver estado sudjeftos en este pais 210 anyos.

La suma del puevlo ke salyeron de el Ejipto era 600 mil almas de ombres de 20 anyos para ariva fin a 60 anyos en desparte de mansevos, manko de 20 i vyejos mas de 60 anyos i de mujeres i kreaturas i al diya salyeron tambien muncha djente de otros puevlos ke estavan en el Ejipto i se adjuntaron kon los djudyos.

El puevlo ejipsyano konosyendo a las karas la grande endjustisya ke kometyeron kon los djudyos en lugar de tantas buendades ke vyeron de el, i vyendo ke ay Dyo en los syelos ke paga a kada uno sigun su ovra, kijeron afalagarsen un poko kon eyos, i les fueron regalandoles muncha plata i oro i piedras presyozas, munchas kozas  valutozas, i les azian demandar todo lo ke tenian menester para darles en tal de afalagarlos, i ansi salyeron los djudyos de Mistrayim kon muncha rikeza sigun se lo prometyo el Todo Poderozo a Avraam kuando le avizo lo ke teniya ke arivar a sus ijos.

Salyendo del Ejipto, no se olvido Moshe Rabenu de tomar kon el, el sirkelyo de Yosef sigun lo enkomendo antes de su muerte. Los grandes del puevlo tambien tomaron kada una el sirkelyo de los 11 ermanos de Yosef, los kapos de los shevatim i se los yevaron kon eyos.

Siz de yorumunuzu yapın

Tüm Yorumları Görün