Metsora

Las dos perashiyot nombradas Tazria Taara nos enbeza lo bueno ke trae a la persona el avlar bueno de entremeterse kon palavras de Ley de mitsvot i no venadades. El ombre, tyene paga buena de parte del Kriyador kuando aze lo bueno i lo derecho.

Pero, a la kontra si auzo la aluenga a avlar mal por ken kere ke sea komo se yama en la lingua ebrea, Lashon Ara, palavras non buenas i raportar avlas ke puede traer danyo a la djente i a el mundo, la pena es muy fuerte.

Nuestros savyos eksplikan el verseto del livro Mishle de Shelomo Ameleh. La vida i la muerte estan dekolgados en la aluenga. Si la persona enplea su avla para bueno alarga su vida. A la kontra malorozamente se danya su vida i su salud. Sontrae asi mismo angusya.

El biervo “tsaraat’, lepra, ke meldamos en las dos perashiyot de esta semana, lo eksplikan nuestras savyos “motsi shem ra” el ke kita fama mala kere dizir el ke avla mal por su serkano se apena kon esta yaga.

Dizen nuestros savyos: La espada puede danyar a el ke esta serka de el ma el ombre kon su aluenga puede danyar tambien a los ke estan leshos. Lashon ara es un defekto de los mas grandes igual a sirvir idolos. Miryam, la ermana de Moshe Rabenu, se apeno de parte del Kriyador, solo porke avlo kontra Moshe Rabenu. De aki se puede entender ke karar de grande es el defekto de avlar kontra una persona i no dar enportansa tambien a este sinyal. Estonses las yagas le pasavan sovre su kuerpo. Kuando se viya akeya persona sovre su kuerpo las yagas de Lepra, se apartava de parte el Koen de la djente, morava un sierte tyempo solo estonses se enbezava el yerro grande ke es de avlar mal por su konpanyero. Siguro ke esta persona iva tornar en teshuva si iva alimpyar de su delito. El eskopo de estas yagas era de kreyar en la persona un buen karakter, azerlo una kriyansa nueva i limpya.

Por el leprozo es dicho: La santedad no puede tokarlo; a el santuvaryo no puede vinir, asta ke va kumplir los diyas de su limpyeza. Este verseto vyene a enbezarmos: La persona deve de saver: Si no se alimpya de su enkoniyas, no deve de vinir a la santedad. A la persona ke se yagava (Metsora) la traian a el Koen, el Koen era el ke bendiziya al puevlo kon amistad, el ke presigiya la buendad. El kon sus buenos konsejos, kon sus dulses palavras lo tornava al ombre al kamino derecho. En la perasha meldamos el verseto: El kaveyo en la yaga si es blanko, el Koen lo kitava enkonado. De este verseto nos enbezamos: Si el ombre malgrado su edad avansada ke sus kaveyos ya se enblankesyeron, no torna a la buena es ke no esta en buen kamino. Sino ke la persona kuando esta en sus fuersas, deve de tornar al kamino derecho.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın