kanada REklam

Una semana yena de evenimyentos

Una semana yena  de evenimyentos

Todos saven ke en muestro payis las eleksyones munisipales se van a realizar diya de alhad. I todos saven ke los anyos dalkavo estamos bivyendo una tansyon antes de todo modo de eleksyones. Vemos ke de una parte se topa un poko mas de los sinkuenta por syen i de la otra vanda un poko manko de los sinkuenta por syen. I reelmente esto esta kreendo una tansyon en el puevlo. Si keresh krear senaryos ya es posivle de topar munchos. El otro payis ke es influensado por las eleksyones es Israel. I aya antes de las eleksyones topan un alay de senaryos para pueder ser elijidos. Ay dos-tres diyas ke el Prezidente Amerikano eskrivio un tweet por las montanyas del Golan i tuvimos syertos problemes mizmo kon el dolar. El dolar pujo porke el Presidente Turko no fue kontente de este tweet i por la desizion ke fue tomada. Ya savemos ke ay 52 anyos ke Israel esta plasado en las Montanyas del Golan i reelmente de sus punto de vista tyenen de menester de este teritoryo por el avenir del payis. Es djusto ke los Siryanos pensan de la mizma manera i tyenen de menester de estas tyerras. Munchas personas se akodran ke la armada Israelyana estava para ir a Damasko ke se topa apenas a sinkuenta kilometros del Golan i ke el prezidente Siryano Esad demando de aretar la gerra porke vido ke esta en perikolo (tehlike) i todos los estados Arabos achetaron. Ya savemos ke en Israel, las eleksyones se van a realizar en el mez de Nisan. Komo el primer ministro tuvo syertos problemes i ke kere ganar una otra vez para pueder ser primer ministro i el esta gerreando de todas las vandas.

Espero ke esto todo va ser por el bien de los payizes; i por el bien de muestra rejyon. Savemos ke el Medio Oryente es la rejyon la mas arrebolteada (huzursuz) del mundo. I malorazamente despues de las eleksyones todos no se azen pas i es los puevlos ke kontinuan a sufrir.

 Oy en diya en diferentes payizes mas de sinkuenta por syen de la populasyon ke son mas populistos kuando votan para una koza ke va ser un problem emportante para el payis no les emporta. Vimos esto en la Inglatierra ande votaron para salir de la Union Evropea. Agora el payis esta bivyendo un problem ke es muy emportante para el futuro de la Inglatierra. Milyares de dolares estan trokando de payis i todo modo de djente estan demandando ke payis va ser la mueva kapitala de la moneda, Paris o Berlin o una otra sivdad de la Alemanya. Mizmo syertas rejyones de la Inglatierra no keren mas estar kon los inglezes. Es djusto ke la demokrasiya es el mijor rejim politiko ma oy en diya kon todos los problemes, mizmo este rejim mos puede krear problemes muy emportantes.

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın