kanada REklam

La mueva direksyon del Muzeo Djudyo

Es kon grande plazer ke fui elijido a la prezidensya de la fondasyon del Kinsentenario ke es responsavle del Muzeo Djudio de muestra sivdad. Ya devesh de saver ke no avia otro merakli para este posto. I kon munchos esforsos reushi a formar un Konsilyo de Administrasyon. Kreo ke en muestra komunidad los anyos dalkavo, ay mas pokas personas ke keren lavorar en las ovras de byenfezensya i mizmo en las asosyasyones o fondasyones kulturalas. Kreo ke el problem es ke keremos dirijir kon unas kuantas personas i este modo ay muy poka djente ke tyenen la oportunidad de pueder lavorar en estas asosyasyones o fondasyones.

En el Sentro Sefardi vimos ke kon munchos miembros ke lavoran se puede organizar munchas kozas. Este anyo en el Dia del Ladino (Judeo-Espanyol) vimos lo ke se pudo reushir kon munchas personas. I fue una reushidad. Despues de kuatro semanas, la djente esta avlando dainda sovre este diya.

En eskojendo las personas ke van a tomar lugar en la direksyon ize syertos esforsos para azer un Konsilyo de Administrasyon kon mas muncha djente. Kreo ke esta fondasyon deve de realizar munchas aktividades para travar la atansion de la djente; la djente de muestra komunidad i la djente ka se topa en la kaye.

Ya se ke mos manka syertas kozas teknikas. Mizmo no tenemos bastante personel para kontrolar las personas ke vijitan el muzeo.

Entre las ekspozisyones ke vamos a realizar una de las mas emportantes va ser la ekspozisyon de las “Megilas de Purim”. Vamos a realizar esta ekspozisyon en el empesijo del mez de Nisan, una semana despues de Purim. Estamos esperando de muestros korelijonarios ke van a emprestar sus Megilas para esta ekspozisyon. Si telefonash al muzeo (0212 2926333-34) vamos a embiyar una persona i la vamos a tomar kon un resivo. Este modo vamos a ekspozar una de muestras rikezas.

Ay syertas personas ke me estan demandando de ke serrash el Muzeo el diya de alhad a las dos. La djente, dia de alhad empesa al diya despues de las onze. I si keresh vijitar muestro muzeo, se deve de vijitar entre shishes i pushos. Kreo ke devemos de organizar mizmo syertos konsyertos o konferensyas o resitales mizmo puedemos amostrar filmos diyas de alhad para ke la djente venga al muzeo para vijitar i tomar parte en una aktivitad.

 Si no keremos una aktivitad asemejante komo el muzeo vamos a pyedrer el mijor elemento para azer konoser al puevlo muestro pasado i muestra istoria. Lo ke izimos por muestra patria. Ay puedeser syertos miembros de muestra komunidad ke no kreen en este modo de lavoros. Ma no esto partajando estas ideas. Si reushimos a reflektar muestra istoria para el puevlo i para los mansevos de muestra komunidad, esto va ser un grande sukseso.

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın