Las eleksyones en muestras fondasyones

Silvyo OVADYA Köşe Yazısı
27 Şubat 2019 Çarşamba

En muestro payis las minoritas relijiozas (los Gregos, los Ermenis i los Djudios) tyenen mas de 160 fondasyones. I estas fondasyones normalmente azen sus eleksyones kada kuatro anyos. Ma no se de ke razon, ay mas de syete-ocho anyos ke estas eleksyones no se estan realizando. Es una dechizion de la Direksyon de las Fondasyones o una desizion politika? Ke esta afitando? En siertas fondasyones, ay miembros ke no son mas en vida i ay muy pokos dirijentes ke pueden lavorar. En Kırklareli, tenemos una fondasyon ke es responsavle de la Sinagoga i de los syete magazenes ke tyene en el doredor de la sinagoga. I tyenen un simeteryo. No se si les apartyene. Malorozamente la semana pasada el Prezidente de esta fondasyon, el Sinyor Pinhas Haleva mos desho la buena vida. Era la sola famiya ke mora en esta sivdad. El, su mujer i sus ijo. Konosi al sinyor Haleva trenta anyos antes i kuando era prezidente de la komunidad, un Shabat mos fuimos a Kırklareli para la tefila de Shabat. I eramos mas de sinkuenta almas. Mizmo despues mos fuimos a un restoran de kampos (kır lokantası) ande pasimos el diya.

Unos kuantos anyos antes, el sinyor Haleva me telefono dizyendome, ke tienen de menester de unos kuantos bankos para ke la djente pueda asentarse kuando vyenen a vijitar la sinagoga Mekor Hayim de Kırklareli. I le embiyimos unos kuantos bankos ke no se empleava de una sinagoga. Ya savemos ke despues ke la Grande Sinagoga d’Andirne se avriyo munchos turistos empesaron a vijitar este edifisyo. I syertos tures pasando por Kırklareli i vijitando i la sinagoga de esta sivdad. El diya ke esto eskrivyendo este artikolo vijiti su mujer i sus ijos i me kontaron ke kuando teniya mijor salud izo todo su posivle para mantener esta sinagoga. Despues ke se muryo, pishin telefoni a la avokata Suzet ke lavora para la Fondasyon de la Komunidad Djudia para saver ken son los miembros de la administrasyon de la fondasyon? I malorozamente vide ke los kuatro de los syete miembros del Konsilyo de la Administrasyon no estan en vida. I solo tyenen dos miembros de reserva. Esto fue uno de los problemes de no azer eleksyones. Malorozamente la mas grande partida de los dirijentes no son bastante mansevos i si una administrasyon reyna (hüküm sürmek) dyes anyos o mas los ke lavoran empesan a enfasyarsen. Esto no es un echo profesyonel ande puedes lavorar anyos. I kuando una administrasyon lavora anyos i panyos, es mas yuch krear muevas ideas.

Para Kırklareli fuimos muy kontentes de saver ke su ijo Rıfat, ke es miembro de la Administrasyon, izo todo lo menester i todo esta en regla.

Esperamos ke la direksyon de las fondasyones de karar para ke muestras fondasyones realizen muevas eleksyones eskojiendo muevos miembros para los konsilyos de administrasyon.

Kualo es la populasyon djudia oy en diya? No es muy kolay de saver egzaktamente. Ma kreo ke teniamos serka de vente mil djudios en Estanbol i mil i dosyentos en İzmir, sesh o syete anyos antes. Savemos ke tuvimos syertos problemes ekonomikos en muestro payis. Para syertos mizmo se ve problemes politikos. I munchas famias mansevos o ayedados eskojeron de bivir en Israel, en los Estados Unidos o en diferentes payises de la Evropa empesando por la Inglatiera. Espero ke estan kontentes i orozos ande estan bivyendo. Ya savemos ke no es muy kolay de pueder adaptarse a un muevo payis despues una syerta aedad. Ma mi opinion es ke oy en diya, kinze mil djudios estan bivyendo en Estanbol i el nombre de los İzmirlis no es manko de mil almas. Pujados i no aminguados.

Kero eskapar mi artikolo transmetiendo mis kondoleensyas a la Famiya Haleva. I para el Sinyor Pinhas Haleva; ke su alma repoza en Gan Eden!

 

Siz de yorumunuzu yapın

Tüm Yorumları Görün