Kaminando i Avlando

Silvyo OVADYA Köşe Yazısı
13 Şubat 2019 Çarşamba

Esta semana kreo ke estavash asperando ke iva eskrivir un artikolo sovre el Dia Internasyonal del Ladino/Judeo-Espanyol. Ma va eskrivir este artikolo por El Amaneser. Tengo de kontarvos munchas kozas sovre la kultura. La kultura muestra.

 Esta semana muestro amigo de Fransia, François Azar vino a Estanbol porke estava invitado al DIDL (Dia Internasyonal del Ladino/Judeo-Espanyol). I avlimos sovre munchos sujetos.

Me konto ke estava redijando un livro de un sinyor Nisim Benezra ke bivyo en Kuzgundjuk i empesi a kontarle un alay de kozas sovre este kazal. I kada vez ke le estava kontando un evenimyento me estava kortando la palavra i me estava kontando la mizma koza ke meldo. I Shabat demanyana lo deshi a la Orasyon de Shabat en la Sinagoga Beth Yaakov de Kuzgundjuk.

Topo ke la orasyon estava fantastika. Despues del desayuno el Gabay Pinto le izo kaminar las kazas del kazal dandole eksplikasyones sovre syertas kazas. Despues kuando le telefoni para demandar komo se paso el paseo, el Sinyor Pinto me disho, “Konose mijor de mi munchas kozas sovre Kuzgundjuk”.

 No se si konosesh la revista “Kaminando i Avlando”. Es una revista publikada por la asosyasyon Aki Estamos i el Sinyor Azar es muy importante para esta revista. En la publikasyon dalkavo ay syertas kozas ke son muy enteresantes.

Ay un artikolo eskrito por la Sinyora Doğa Filiz Subaşı ke asistyo a la Universitad d’Enverano i dyo una konferensya sovre su teza. Es sovre el livro de Isak Gabay ke eskrivyo en djudezmo kon letras rashi. El livro se yama “Yıldız i sus sekretos; el reyno de Abdülhamid” i fue publikado en 1908. Reelmente es interesante ver livros asemejantes. Es un livro de istoria eskrito por un djudyo de esta epoka. Kreo ke es una teza para de doktorado. Esta sinyora agora lavora en una universitad en Turkiya, i esto no es su primer lavoro en este sujeto.

Ay anyos ke so koleksyonaryo de kart postales (i syertas fotografias muy raras) djudaikas sovre el Imperio Otomano (tomando Selanik i las sivdades ke fueron okupadas por el Impero Otomano). No vos pareska ke egzisten munchas kart postales! I ay muy pokos koleksyonaryos konosidos en el mundo. I fue una koensidensya ke en este numero de la revista, esta dando haber de las fotografias de uno de los mas importantes koleksyonaryos sovre las fotografias del Imperio Otomano. I se pueden topar bastantes fotografias sovre syertas famiyas. I se pueden topar mizmo fotografias de famiyas Djudias d’Estanbol. Para ver las fotos ya puedesh emplear el adreso elektroniko: www.getty.edu/research 

El treser punto es ke un sefaradi Amerikano, orijinaryo de muestro pais, Beni Aguado, kon dos Espanyoles fondaron en el internet una mueva inisyasyon para propajar syertos filmos ke estan kargando en el YouTube. El adreso es: Ladino 21. En la revista, ay una entrevista realizada kon Carlos Yebra Lopez ke es uno de tres fondatores. Puedeser embiyamos a este kanal la pyesa de teatro ke fue realizada oy en el DIDL.

Vos konti sovre el muevo sit de internet, www.getty.edu/research. Ma kreo ke kedi tadre. Porke fin a ke di karar de eskrivir los tres gerreros dyeron karar de gerrear kada uno de su vanda...

 

 

Siz de yorumunuzu yapın

Tüm Yorumları Görün