Beshalah

Rav Yeuda ADONİ Köşe Yazısı
16 Ocak 2019 Çarşamba

En la perasha de Beshalah meldamos la salidura de Misrayim. Los grandes milagros ke izo el Todo Poderozo a los djudyos. El Todo Poderozo  kito a el puevlo djudyo de esklavaje a libertad, de eskuridad a luz grande. En la salidura de ayifto, Moshe Rabenu no se olvida la palavra de Yosef Atsadik ke disho a sus ermanos: Kuando vos va rihmir el Kriyador i vos va yevar a la tyera prometida no vos olvidesh de yevarme a mi kon vozotros. De fakto, ke meldamos en la perasha Vayikah Moshe et atmos Yosef… i tomo Moshe los guesos de Yosef, por kavza ke les dyo djura a sus ermanos.

En el Talmud meldamos: Sigun lo bueno ke azemos en este mundo kon su demazia mo lo paga el Kriyador de bueno. Moshe Rabenu se okupa de tomar los guesos de Yosef Atsadik, el Kriyador, El mismo lo entero a Moshe Rabenu komo lo meldamos en la perasha de Vezot Aberaha, Vayikbar oto bagay. En el livro de Yeoshua meldamos ansi i los guesos de Yosef ke los kitaron de ayifto. Los enterraron en Shehem. Sovre esto dize el Talmud de nombrada de Rabi Hama bar Hanina. Una persona ken enpesa a azer una Mitsva, i la kompleta otra persona es ke la kompleto, se konta komo el la izyera. Ma aki no era posible ke Moshe Rabenu la puediya kompletar la mitsva de enterrar los guesos de Yosef Atsadik por kavza ke Moshe Rabenu no iva entrar a la tyerra prometida. Dunke la paga buena del Kriyador ke le dyo a Moshe Rabenu fue, de enterrarlo el mismo a Moshe Rabenu. Kuando salyo el puevlo de ayifto, i estavan pasando la mar ruvya, el puevlo, kayeron a un grande dezespero. Ken diziya nos echaremos a la mar, ken diziya tornaremos a Mitsrayim. Ken diziya gerrearemos, i ken diziya esklamaremos a el Kriyador. Moshe Rabenu reporto el komando del Kriyador i les disho al puevlo, “el Kriyador va azer la gerra por vozos. Vozos espera la salvasyon ke vos va trae el Todo Poderozo”.

 

Siz de yorumunuzu yapın

Tüm Yorumları Görün