kanada REklam

“La Kultura”: elemente emportante para azer konoser una komunidad

“La Kultura”: elemente emportante para azer konoser una komunidad

La semana pasada teniya intensyon de eskrivir sovre este sujeto, ma komo los sujetos del “empesijo  del anyo” estavan un poko pezgados, no tuve esta posibilidad. Oy no tengo dingun preteksto para no eskrivir sovre esto.

Kuando empesimos a realizar los dias de la Kultura Djudia Evropea serka vente anyos antes, reelmente el puevlo mostro un grande intereso. Aviya miles de personas ke viyan por la primera vez en sus vidas lo de adyentro de una Sinagoga. La “Kula” i su dorredor es un kuartier turistiko i mizmo los sivdadinos de esta sivdad vijitan este kuartier. I kada vez ke pasan ven ke egzisten munchas sinagogas en la “Kula”. Ma en primero, por seguridad no keremos ke el ke kere topa la posibilidad de entrar en un edifisio ke apartiene a la Komunidad Djudia. Ma en estos diyas, kon las prekosyones de seguridad, los syenes mizmo miles de personas no krean un problem.

  Vimos la mizma koza este anyo kuando esta organizasyon fue realizada en el Muzeo Djudio kon la Sinagoga de Neve Şalom. I reelmente los ke organizaron tuvieron un grande sukseso. Kon la media elektronika reusheron la entrada de mas de dos mil personas. Puedeser syertos asistieron solo a una aktividad, ma no es importante. Ya se ke syertos kijieron organizar syertas aktivitades en la kaye. Ma la seguridad fue un problem. Mi opinion es ke puedemos organizar diyas asemejantes en la primavera ande el tyempo es mas klaro i el sol desaparese mas tadre. Este modo, mizmo si se organiza un konsyerto, a las sinko despues del medyo diya, va estar eskuro. Es djusto ke no reushimos a posedar un restorante ke vende komidas sefardis i djudias. Ayudimos muncho para tener un restorante “Kasher”, ma komo kada vez, tuvimos presyos altos, munchas personas no kijeron ir a este restoran. I komo aviya poka djente, los presyos eran altos. No se kualo es lo ke devemos de posedar. Por el turizmo i por muestra kultura devemos de organizar (no la komunidad, ma una persona deve de tomar una inisyativa) un restoran ande se kome komidas djudias, ma no muy karas, deve de vender karne kasher (sin komer kazik), ma deve de ser avyerto mizmo diyas de shabat. Porke es uno de los diyas emportantes ke puede lavorar.

Dyes o dodje anyos antes kuando era prezidente de muestra komunidad, demandi a los rabis kon syertos amigos para organizar diyas en la Sinagoga Neve Shalom a los elevos ke estudian la teolojia en muestra sivdad. I lo realizimos kon unas kuantas universidades ma malorozamente no kontinuimos regularmente estas aktivitades.

Dos semanas antes en Ankara, muestro prezidente İbrahimzadeh avlando disho, “deke no organizamos en la Sinagoga de Ankara ke es serrada la mas grande partida del anyo aktivitades i lisyones en primero sovre las relijiones i la istorya de las relijiones”. Kuando estavamos avlando sovre este sujeto, unos kuantos profesores de las universidades de Ankara estavan kon mozotros i fueron muy kontentes de oyir esto. Puedemos mizmo dar apoyo sientifiko para dar konosensya sovre la ley i la istoria djudia.

Tengo munchos otros egzempyos ke kero partajar kon vozotros ma esto va ser el materyel de un segundo artikolo.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın