Esto eskrivyendo este artikolo el primer diya del anyo 2019. Anyada buena i klara kon salud i echos buenos. Kada anyo empesamos kon dezeos, augurios, demandas buenas. No semos lokos para demander hazinuras, malores i dezgrasyas.
Ma esto normalmente no se realiza por toda la umanidad. Vamos a ver i este anyo tempestas, fuegos, rajes en el mundo. Es djusto ke la sensya es kapache de topar muevos remedyos por las hazinuras, deskuvyertas para un mundo manko suzyo i kon un aver mas puro; deskuvyertas para tapar el burako ke se esta engrandesyendo en el doredor del mundo…
Savemos ke oy en diya kon la demokrasia negra empleada estamos reushendo a eskojer un alay de lokos en todo los payizes. Los Estados Unidos i la Rusia ke son kreo los dos payizes los mas emportantes del mundo tyenen prezidentes ke se komportan komo keren. Mizmo en Fransia reusheron a eskojer un mansevo ke no tyene ni un partido politiko. I despues lo toparon muy ineksperimentado para no dizir torpe i salieron en las kayes kon los jiles amariyo i mallograron una de las mas ermozas sivdades del mundo i djusto un mez antes del muevo anyo ande el pais resive milyones de turistos de las kuatro partes del mundo. Ke piedrita ekonomika.
En muestro payis despues de las difikultades ekonomikas i la suvida en valor del dolar i del euro, estamos kon esperansa para el anyo muevo. Ma malorozamente i este anyo vamos a bivir las eleksyones locales para eskojer los mayores de las sivdades i de los kazales. Ay munchos senarios ekonomikos por el mez de Avril, despues de las eleksyones. Se avla de desgrasyas ekonomikas. Espero ke esto todo no se va realizar. Se disho la mizma koza por los tres mezes dalkavo del 2018 ma no se realizo; mizmo vimos ke el dolar i el euro pedreron de valor.
En empesando mi artikolo teniya entisyon de eskrivir sovre muestra komunidad dizyendo ke el solo remedyo para azermos konoser al puevlo deve de ser las aktividades kulturales. I los diridjentes de muestra kolektivitad deven de apartar un budjeto importante para este buto. En la istoria vemos ke “La Kultura” es el medio el mas emportante para el emperyalizmo kultural. Vemos ke dainda oy en diya los payizes del norte de la Afrika (El Maroko, la Tunisia i la Aljeria) avlan dainda el Fransez i la kultura franseza reyno mas de un siglo en estas tyerras. Ay munchos egzempyos asemejantes por los inglezes. Muestra komunidad no tyene intisyones de emperyalizmo ma deve emplear esta posibilidad para ke el puevlo konoska mijor muestra kolektivitad i los djudios turkanos.
