Compass doganbaruh

Un fotografo modesto ma korajoso

Un fotografo modesto ma korajoso

Unas kuantas semanas antes, el famozo istoryano (tarihçi) Rıfat Bali me embiyo (no solo a mi - a munchas personas) un mail demandandome ande se topa el archivo del fotografo Jak Belman ke lavoro anyos por muestra komunidad i ke travo miles de kares para dar vida a los evenimyentos bividos por muestra kolektividad. Mizmo me demando si puediya eskrivir un artikolo en este livro ke acheti imedyatamente. Ma no entendi egzaktamente; toparon siertas fotografias del fotografo en un vendedor de livros i de efimeras vyejas. Pekado i manziya. Esto demandando reelmente si es mozotros ke los echimos al chop.

Anyos antes, ganeden bueno ke tenga, tres diyas de fin de semana me fui a vijitar al sinyor Jak Belman, abashando de la Ada, para pueder valorizar su archivo ke es un trezoro para la istorya de muestra kolektividad. No me esto akodrando egzaktamente kuando era? I pasando los diyas de fin de semana formimos una chika koleksyon para azer una ekspozisyon en el Schneidertempel. I a lo ke me akodro, su ija Vicky mos ayudo buen karar para ke se forme una buena ekspozisyon. Ma estos diyas, la mas grande partida de los filmos negativos estan en una negra situasyon en la umidita de un vyejo apartamento. Los negativos en kutis de kalsas i lo mas apegados (yapışmış).

No me esto akodrando kuando era? Ma me akodro ke antes de Belman aviya un ombre ke viniya kon motosiklet al Neve Şalom para tomar fotografias en las bodas. Era un ombre robusto kon kaveyos gris. I kreo ke Jak Belman empeso kon el i despues fue patron de este echo. En el empesijo de los anyos ‘70 no era el ke fotografiyava en las bodas si no me esto yerrando (esto eskrivyendo este artikolo de noche i no kero bushkar la djente para demandar, mizmo si no tenemos mas bastante djente ke se akodran de esto.)

 I ay dyez diyas ke esto lavorando para topar los filmos i las fotrografias ke tenemos en diferentes fondasyones i asosyasyones sin demandar a munchas personas lo ke tyenen en sus albumes.

I esta demanyana (lunes) teniya una seduta kon dos fotografos famozos para formar un archivo para el gran Rabinato o para muestra kolektivitad i en mizmo tyempo para las fotografias de Jak Belman. Ya se ke este projekto ke va tomar muncho tyempo (a lo manko un anyo) i munchas paras ma kon el push (itme gücüyle) de Rıfat Bali se azera un buen echo.

Vamos a tener un grande sukseso si Rıfat Bali mos da la permisyon ke empleyemos syertas fotografias ke tyene en su archivo ke son dijitalizadas.

Syertas personas de vez en kuando keren azer bushkedades en los archivos del Gran Rabinato. Ma no keremos partajar estos dokumentos. Tenemos bastante material, ma mi opinion es ke deviamos de tener muncho mas. Se dize ke las Komunidades Djudias paresen al payis ke moran. Komo el payis ke bivemos no dyo bastante emportansa a los archivos i a la dokumentasion, kreo ke muestros antepasados izyeron la mizma koza.

Oy en diya es kompletamente diferente. Kon las komputadoras, tenemos la posibilidad de tomar notas en kada seduta i es mas kolay de pueder konservar esto todo. Espero ke vamos a tener un archivo mas korekto en poko tyempo.

I para eskapar mi artikolo vos rogo de avizarmos (por el Şalom) si tenesh fotografiyas vyejas ke son tomadas por el Sinyor Jak Belman…

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın