Compass doganbaruh

Tantas aktividades kon tanta djente

La djente esta avlando ke mos estamos aminguando. Es djusto ma esto no kijo dizir ke estamos asentados en la koshika, ni ke estamos aziendo nada.

En primero vos kero dizir ke vamos a tener una mueva administrasyon en muestra komunidad. Muestro prezidente İbrahimzadeh ke lavoro sesh anyos komo prezidente i tres anyos komo vise prezidente en un anyo va dar su posto al sinyor Erol Kohen, ke fue elijido prezidente por el Konsilyo de los Reprezentantes. Los muevos miembros van a ser en fonksyon. Solo el posto de prezidente va trokar de patron en un anyo. Felisito los miembros ke fueron elijidos.

El alhad pasado en la eskola Djudia se realizo una otra vez el Diya del Limmud. Malorozamente no topi la posdibilidad de partisipar. Ma fue un diya reushido ma kon manka djente (no komo los anyos pasados). Felisito a todos los ke se okuparon para la realizasyon de este diya.

En Israel en Raanana el grupo de teatro turko tomo lugar en la shena tres vezes para djugar el muzikal “Kula ‘930”. I tuvieron un grande sukseso. En siertas partes todos los espektadores partisiparon para kantar endjuntos kon los aktores i aktrisas. Fue reelmente un grande sukseso. Kero felisitar los ke organizaron i los ke tomaron lugar en la shena. Mizmo en Israel no es muy kolay de realizar un evenimyento asemejante.

En eskrivyendo este artikolo esto emosyonado porke amanyana diya de djueves, me va ir a Smyrna, i va vijitar la sinagoga ke fue restorada: La Sinagoga Portugeza. La vijiti dos anyos antes antes de su restorasion i reelmente estava en una negra situasyon. Kreo ke oy en dia despues de su restorasyon esta en una situasyon buena ande la estan empleando komo un Sentro Kultural. El arkitekto muy famozo Daniel Libeskind esta envitado para esta okazyon i en la envitasyon se esta avlando del Muzeo Djudyo de İzmir. No se kualo es oy en diya la populasyon djudia de esta sivdad. Deve de ser entre mil i mil i kinyentas almas. Ma kreo ke estan lavorando kon muncho dezeo. Estan restorando las sinagogas i keren azer un muzeo kon las sinagogas ke tyenen.

I vos kero kontar sovre las aktividades kulturalas ke estamos azyendo en la sinagoga de Andirne. Teniamos una ekspozisyon ande el sujeto era las mujeres de esta sivdad sin azer dinguna diferensya entre sus raizes (djudias, muzulmanas, bulgaras, gregas, ermenias, zinganas, ets.). I el tredje de este mez vamos a tener una mueva ekspozisyon kompozada de las fotografias del famozo fotografo İzzet Keribar sovre los djudios de muestro payis. Es reelmente una onor para mozotros i para la vida artistika de esta sivdad de ver una ekspozisyon asemejante. El mizmo dia un konsyerto de un Ensemble de Violoncellos ke son un grupo del konservatoryo de la Universitad de Trakya d’Andirne mos van a dar un resital. Ya se ke puedemos organizar mas munchos evenimyentos en esta sinagoga. Ma se puede realizar kon el apoyo de mas munchas almas.

Ay un grupo ke keren vijitar un alhad la sinagoga; les dishe ke munchos mansevos kon sus ijas i ijos tienen la posibilidad de ir a Andirne para vijitar el mas grande Muzeo para las kriyaturas. Es un park de dodje mil m2. Es possible de ver todo modo de animales. 19 maestras (öğretmen) son responsavles para azer vijitar este park a los ijikas i ijikos.

Kreo ke este park va ser una okazyon para ver en Andirne mas munchos mansevos de Estanbol ke van a topar mizmo la posibilidad de vijitar la Sinagoga famoza d’Andirne. La semana ke vyene vos va azer la publisidad de este paseo.

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın