La semana pasada vos konti sovre la ekspozisyon de arte “Contemporary İstanbul” ke se realizo en Estanbol. I un diya despues deklararon ke mas de setenta i kuatro mil personas vijitaron esta ekspozisyon. Si vos akodrash, vos avia kontado sovre la ekspozisyon i ke la avyertura se realizo el 13 de mayo. I Dalia Maya ke es la kuratora de la ekspozisyon metyo un tefter a la entrada i syertas personas eskrivyeron lo ke pensavan. Vos kero transmeter unas kuantas palavras ke fueron eskritas en el tefter. Una profesora amerikana ke va ser muy oroza de partajar lo ke se ambezo de esta ekspozisyon kon sus elevos i kon sus amigos de las Amerikas; la inyeta de Raşel Hora, ke es un personaje prezentada en esta ekspozisyon eskrivyo ke esta muy emosyonada vijitando esta ekspozisyon i disho ke fue muy onorada. Muestro amigo Metin Delevi eskrivyo ke se olvido de mansyonar “La indivina (müneccim) Sara” ke es muy famoza i ke mizmo un artikolo fue eskrito sovre su vida en el livro de Isaac Jack i Rosemary Levy.
Una mujer esta nombrando su granmama Şükriye (ke se yamava antes Klara…) por su ermozura, por su filozofiya, i por sus palavras ke la estan empresyonando mizmo oy en diya.
La mas grande partida de los ke eskrivyeron unas kuantas linyas en el tefter son las mujeres. Kreo komo era una ekspozisyon sovre las mujeres, los ombres se apuntaron i no eskrivyeron. Komo la ekspozisyon tratava de las mujeres d’Andirne ke eran kada una, una eroina (kahraman) i eyas vijitaron la sinagoga i la ekspozisyon komo eroinas. Una grande partida de los vijitadores son personas ke vijitaron la sivdad i la sinagoga kon la ekspozisyon los empresyono bastante.
Kreo ke oy en diya, la djente i las mujeres en partikular tyenen el menester de vijitar ekspozisyones asemejantes para ver la valor de la mujer en la sosyeta (toplum).
La Sinagoga d’Andirne i su anekso ande estamos ekspozando diferentes ekspozisyones este anyo kreo ke va ser un lugar emportante en la vida kultural de la sivdad. Desidimos i keremos azer una ekspozisyon sovre los Ermenis de esta sivdad. Un miembro de las famiyas Ermenis de Edirne ke bive en Fransia eskrivyo un livro sovre la istoria de esta komunidad i kreo kon la revista Paros ke publiko este livro en turko i en franses mos va ayudar en este sujeto. I vamos a ver grupos de Ermenis en Andirne. Asperando esta ekspozisyon devemos de dar karar para la grande ekspozisyon ke va topar lugar en el mez de Mayo. Si no ay un sujeto muy emportante esto pensando de realizar una ekspozisyon kon las kartpostales istorikas sovre Edirne. I vamos a realizar esta ekspozisyon kon siertos koleksyonaryos ke arekojen kartas sovre Andirne. Ke no vos pareska ke son kartas ke komportan sujetos djudios. Es djusto ke egziste una dizena de kartpostales sovre los djudios i los edifisios djudios de Andirne. I ay buen karar de editores djudios ke publikaron syenes de kartpostales sovre Andirne. Estas kartas kontienen munchos sujetos ke no tyenen dar i aver kon los djudios. Si ay personas i Edirnelis ke keren propozar syertos sujetos para organizar diferentes ekspozisyones, esto pronto a oyirlos.
