kanada REklam

Espertandomos de las vakansas

Despues ke mos repozimos dos mezes - para los ke toparon tyempo para repozarsen - abashando de la Ada a la sivdad semos mas kargados i mos vamos de una seduta (toplantı) a una otra i todo modo de aktividad empesa en muestra komunidad.

 En primero vos kero ogurar una anyada buena. Este mez tenemos bastantes fiestas para ser orozos. Kipur, Sukot, Oshana Raba, Simhat Tora...

 Vos kero dizir ke alhad el mueve, topimos la posibilidad de azer el limud-meldado de primer anyo de muestra kerida Klara Perahya. Ya me esto akodrando de su disparisyon unos kuantos diyas antes de Rosh Ashana. I kuando telefoni a la direksion del Neve Shalom me dyeron las enformasyones menesterozas para su meldado. I embiyi tres mesajes al Şalom, al Sentro Sefardi i al grupo del FKD. Ya se ke era tadre i izimos el limud en la keila de la Büyükada porke el mizmo diya avia el korte d’el padre de un amigo. Es djusto ke dyes o dodje personas asistyeron a este meldado, spesiyalmente para Klara ma eramos un grupo de mas de sinkuenta personas ke todos konosen a Klara. Es un dover para mi i para muestro Sentro de komemorar Klara i su marido Eli Perahya kada anyo. I puedeser azer este limud a la demanyana en el Oryom, lugar ande fue fondado sovre sus ideas.

 Diya de alhad, teniyamos la seduta de la administrasyon de muestro Sentro. En primero vos kero dizir, partikolarmente para los ke biven en las Amerikas o ke tyenen el mazal de resivir El Amaneser dos tres semanas despues de su publikasyon, ke vamos a tener abonados ke van a pueder meldar sovre el internet i a un mijor presyo. Kreo ke esta semana muestro sitio de internet ke esta en renovasion (ke mos esta tomando bastante tyempo – va apareser en servisio. Son las sinyoras Emel Benbasat ke se esta okupando bastante kon la sinyora Lara Ruso ke se topa en Kanada.

 Syertas personas pensan ke el judeo-espanyol esta en flakeza (zafiyet); no es djusto. Kuando estash en la administrasyon kada diya ya tenesh la posibilidad de responder a muncha djente i munchos establesimyentos (kurum) ke mos demandan diferentes kozas sovre muestra kultura.

 El 14 del mez de oktobre, el Muzeo Djudyo kon un grupo de dammas estan organizando “El diya Evropeo de la Kultura Djudia”. I keremos azer una prezentasion en este diya. Porke kreemos ke este modo de aktivitades son una emportante okazyon para azer konoser muestra lingua i kultura sefardi al publiko del payis. Grasyas a Emel, ke lavora en muestra administrasyon i en esta organizasyon.

En muestra eskola estan preparando un kurso sovre la Kultura del Djudaizmo i es kon grande plazer ke mos ambezimos ke keren ke prezentamos dos kursos sovre la Kultura Sefardi i la lingua Judeo-Espanyola.

Kada semana eskrivyendo mis artikolos va preferar de darvos novelas sovre muestro sentro i muestra kultura al lugar de avlar de la politika en jeneral. No kero apretar el korason de los ke tyenen dar i aver kon la lira turka dizyendoles ke el dolar amerikano vale mas de 6 i 20 liras turkas (ya puede trokar kuando vash a meldar este artikolo!).

 

 

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın