Emanuel Levinas mos dize: ‘La relasyon al proksimo es asimetrika, no devo asperar resiprosidad’ (La relation a autrui est assymetrique; je ne dois pas attendre de reciprocité.)
En eskojendo de avlar de Emmauel Levinas, no tengo la pretensyon de kerer komunikar kualkyer opinyon personal sovre su ovra ; no la konosko realmente para pueder transmeter kualo ke sea de realmente interesante.
Mi solo objektivo es simplemente de despertar la kuryozidad de syertos de mis lektores i de pusharlos a azer eyos mizmos investigasyones en el espasyo elektroniko o byen en kualkyer otro manadero de saveduria ( livros i varyos komentaryos publikados en revistas apropyadas) afin de entender la verdadera sinyifikasyon de los tekstos eskritos por Emmanuel Levinas.
Munchos de sus komentadores ke estudyaron profundamente su ovra afirman ke Emmanuel Levinas fue uno de los mas grandes filozofos djudyos desde la epoka de Maimonide. İ mizmo uno de entre eyos nombrado ‘Leon - Marc Levy ‘mos ambeza ke Emmanuel Levinas es tambyen rekonosido komo uno de los mas importantes filozofos de kualkyer relijyon del Venten siglo, ma ke su ovra konstitue un problema mayor el kual es ke eya no puede ser rezumida en unas kuantas ideas o formulas, lo ke rende muy difisil su analizis.
Koensidensya o konsekuensa direkta de su manera de pensar, Emamnuel Levinas lavoro partikularmente sovre el tema de la kompleksidad humana .
Pokos son los otros pensadores del Venten siglo ke posedan su potensyal i tambyen su varyedad de elementos kulturales: ‘Literatura Rusa’ i tambyen varyas otras ‘Literaturas Evropeas’, ‘Saveduria filozofika kaji ensiklopedika (prinsipalmente en la esfera de la metafizika)’, ‘Syensya Biblika’ transmetida por un buen profesor al kual su padre avia demandado de ensenyar el Hebreo a sus tres ijos, i mas tadre, dospues la segunda gerra mundyal, ‘Syensya Talmudika’ a la kuala Emmanuel Levinas fue introduizido por el afamado ‘Monsieur Shushani’ ke el avia enkontrado grasyas a uno de sus amigos.
Ken era realmente Monsieur Shushani ? la kestyon keda kaji syempre sin repuesta. En todo kavzo, el era un personaje a primera vista muy estranyo, mal vestido i mal penyado, semejante a un bohemyano venido de un lugar deskonosido del kozmos, un personaje ke nunka fue estavle, nunka instalado en kualkyer lugar por un largo tyempo, un djenero de vagabundo ke a syertos momentes (por razones ke kedaron syempre obskuras) dezaparesia del espasyo vital por un tyempo indefinido para de muevo reapareser sin dar la mas chika eksplikasyon, ma ke aun su aparensya i su instabilidad, era un grande talmudisto al kual varyos intelektuales djudyos deven una grande parte de sus konosensya sovre este sujeto.
Esto dicho, revineremos a Emanuel Levinas: El nasyo en Lituania al empesijo del Venten siglo, ma despues las olas de antisemitizmo ke a esta epoka se avian abatido sovre la populasyon djudia del Norte/Este de la Evropa, su famiya emigro konsekutivamente en varyos otros payizes vezinos, fuyendo syempre el odyo i la krueldad, para abutir enfin en Fransya a la edad de 17 anyos, lo ke le permetyo de kompletar sus estudyos universitaryos en su payis de akolyo komo tambyen en Almanya ande el fue el dishiplo de Husserl i de Heideger ke gradualmente el parvino a azer konoser en Fransya ma de los kualos ulteryoramente se alesho kompletamente.
En todo kavzo, su opozisyon a Heideger en kualidad de pensador i sovre todo de ‘nasyonal sosyalisto ke no se opozo al nazizmo’ no kedo a ningun momento de devenir de mas a mas profunda.
Paralelmente a su lavoro filozofiko, Emmanuel Levinas okupo muchos altos postos en la esfera intelektual djudia ; entre los anyos 1945 i 1979 el fue direktor de la Eskola Normal İsraelita Oriental ande el formo nombrozas jenerasyones de institutores de la Aliansa İsraelita Universal. De mezmo a partir del anyo 1963 el fue tambyen profesor en varyas Universidades.
Sovre estas ultimas palavras, so ovglidada de interrumpir mi artikolo afin de deshar lugar para la publikasyon de los varyos tekstos de mi kolegas.
Ansi, a kontinuar la semana ke vyene.
