Ay envezes en syertos sektores del lavoro publiko, una egzijensya si no de absoluta homojeneidad de refleksyon, ma a lo manko de bushkida de konsensus sovre varyos sujetos krusyales para los kualos kualkyer punto de diverjensya puede krear problemas difisiles a rezolver.
El kavzo es el sigyente: Todos savemos ke en este momento ande İsrael se topa si no en estado de verdadera gerra ma en todo kavzo en situasyon de fuerte kontestasyon mutual kon la populasyon de Sisjordania, lo ke okazyona atakes de mas a mas sanginaryos de parte de los otoktones, lo mas de los feridos (ke sean djudyos o muzulmanos) son kaji todos otomatikamente yevados a los hospitales İsraelyanos los mas serkanos afin de resivir los primeros kudyos medikales,debasho la vijilensya de la “Asosyasyon Medikal İsraelyana” (AMİ) ke es en kargo de la proteksyon de kual ke sea de entre eyos.
Entonses, una kestyon es formulada: “Sovre kual kriteryo estableser el rango de prioridad de los feridos de resivir kudyos medikales? de kualos de entre eyos, los medikos djudyos deven empesar a okuparsen?” De los ke, mizmo si son enemigos, se topan en situasyon de graves komplikasyones suseptibles de ser fatales? O byen de muestros korelijyonaryos, los kualos (aun seryozamente feridos) no son en real estado de absoluta urjensya?
Lo repeto: “A kualos de entre eyos los shirurjyanos djudyos deven ofreser sus ayudo en prioridad? A los İsraelyanos ke puede ser se estan torsyendo de dolor sin ke esto konstitue una kualkyer amenaza de muerte? O, a los atakantes palestinyanos ke se topan en real reziko de pedrer la vida en kavzo de un retardo de intervensyon immedyata?
Por seguro ke para munchos de entre mozotros, los prinsipyos fundamentales de la ethika egzijen imperativamente la prioridad de salvar de un perikolo de ‘muerte imminente’ kualkyer kriansa humana, ke eya sea amiga o enemiga i la mayoria de los medikos de la “Asosyasyon Medikal İsraelyana (AMİ)” adopto esta formula.
Por kontra, el direktor israelyano del Servisyo de intervensyon de urjensya ‘ZAKA’, kritiko kon vehemensya a este sujeto “el buro de deontolojia de la Asosyasyon AMİ”.
El mos izo saver tambyen ke el profesor ‘Asa Kasher’, uno de los prinsipales investigadores del payis sovre kestyones de ethika, deklaro: “No se puede pensar ke un terroristo gravemente ferido sea kurado antes de su viktima, mizmo si el estado de la viktima es manko peligrozo ke el del atakante.
“A ken dar razon? difisil de topar una repuesta ke puedra ser kategorikamente djusta...
Byen entendido en kavzo de igualidad de risko de muerte,’el fakto de dar la prioridad a un ermano’ es komprensivle; ma eske el problema no troka enteramente kuando se trata de un semejante peligro unikamente para el adversaryo?
Keridos lektores, las palavras “Ama tu proksimo komo ti mizmo” no son kristyanas komo munchas personas lo pensan, ma djudias, i un dia demandaron a uno de muestros grandes savyos de la Edad Medya, ken era para el su proksimo? el Ombre de Sehel respondyo: “kada uno de los humanos, el djusto komo el pekador”.
