Muestra muy kerida amiga Ceni Franko fue rengrasyada kalorozamente de parte del prezidente İshak İbrahimzadeh i del vice prezidente Jozef Nassi por sus presyozos servisyos a muestra komunidad en azyendo konoser kon briyo el gizado djudyo a la okazyon de una prezentasyon de la kozina minoritarya en Turkia.
Ceni Franko es desde un muy largo tyempo una de las figuras las mas valorozas de muestra komunidad por los inkontestavles servisyos ke eya rendyo i kontinua a render a muestra kolektividad i partikolarmente en el espasyo karitativo de ayudo a personas ke se topan en estado de prekaridad.
Mi amiga Zehra Pardo i yo la vimos lavorar intensivamente en la Matan Baseter komo tambyen en el Barinyurt durante mas ke vente anyos, syempre a un mezmo ritmo intenso i regolar, sin en ninguna sirkunstansya mankar a su dover de humanizmo. İnkontestavlemente, Ceni franko es antes todo una grande humanista ke syempre honora i honorara muestra komunidad.
