Una Deskuvierta Sorprendente por Hanuka, muestra Fiesta de Mirakolo i Luz

Esti SAUL Judeo-Espanyol
9 Aralık 2015 Çarşamba

Durante la Primera Gerra Mundial, en Siria, una patruya Britanika deskuvrio, por azardo, el fresko prezente en el sitio de Doura Europos.

Komo se pudo konservar tanto tiempo, estas ruinas de la sinagoga datando del anyo 224 despues de J.C.?

Los abitantes del sitio Doura Europos salvaron sin saver las ovras de la destruksion.

Komo afito?

El templo era situado serka de las murayas del sitio. Los Judios

eforsandosen a arondjar el enemigo, abatieron el tejado de la sinagoga i la incheron de arena del dezierto. La entision era de konfeksionar una proteksion, un obstakolo para eskonder i prezervar la kaza de Dio.

Grasias a esta formula, kuando los Ingleses kitaron a luz esta maraviyoza

Ovra i la deterraron, vieron la deskuvierta sorprendente.

Las kolores frajiles no fueron atakadas ni danyadas desde siglos.

Este fresko (fragmento de1,20 m.) mos prezenta Moshe egzekutiendo lo ke Dio le ordeno, durante el Egzodo, para salvar el puevlo Ebreo de Ayifto i sovretodo del esklavaje.

- Moshe giyando los Judios a traverso La Mar Kolorada kon la intervension Santa.

- La fuzion de diversos trivos en una sola unita, en los anyos pasados en el dezierto, fue desiziva.

- La identidad nasional.

- Un kult komun.

- Un kodigo etiko.

- Un buto komun: LA TIERRA PROMETIDA.

Remarkamos en este fresko dos manos amostrando el kamino de la salvasion.

A la siedra, los shefes de los 12 Trivos alinyados detras de las tropas avangardistas.

A la derecha, la mar ke se retira, los peshkados saltando en poka agua.

El primer puevlo de la antikidad a adorar El Todo Poderoso se salva. Moshe, el prekursor del movimiento, ordena i la mar se serra para englutir a los Ejipsianos (siglo 8 antes de J.C.)

El artisto anonimo ke poseda la fakultad inkomparavle de kontarmos la istoria kon sus linyas i kolores monokromas, es sorprendente, un mirakolo. Supo imobilizar los momentos, la luz, los detalyos, la estruktura, los elementos, para ekspresar la imaje impresionante. Desvelar lo eskondido ke un ojo profano no apersive fasilmente.

Penso ke esta ovra ansiana ke mos enrikese kon la ekspresion de umanos merikiozos, me aze pensar una vez mas a Emile Zola :

“El arte no se puede manifestar si no ay la verdad en el.”

Esperamos otras deskuviertas maraviyozas.

Hanuka Alegre i Paz Mundial.