El mueven “LİMMUD” se realizo este anyo la ultima semana en la eskola djudiya “Ulus Musevi Lisesi”
El konsepto de este anyo fue “Kreer una Diferensya” (fark yaratmak). Mil personas tuvyeron la shans de konoser; akademisyenes etranjeros, merkaderes (iş adamı) emportantes, artistos (sanatçı), ombres de sensya (bilim adamı) i munchas personas espesyalistos en sus sujetos.
El senso de Limmud es en ebreo ambezar. En el Festival de Limmud; el sujeto de las konferensyas fueron sovre el djudaismo i sovre la kultura jeneral.
El festival ampeso kon un kokteyl shabat la noche. “İli Mitrani” izo una avla de avyertura (açılış konuşması) en turko i en ingles.
Despues el marido i mujer “Prof. Dr. Fania i Eli Salzberger” avlaron sovre la baza, el pasado i el futuro de la demokrasiya de Israel.
“Yosef Amihud” ke fue el konsolato (konsolosluk) Israelyano en diferentes paises del mundo, avlo sovre la pas en İsrael, ke no esta pesimisto en este sujeto, ke esta optimisto sovre la pas ke se va realizar kon tyempo entre İsrael i los paisez arabos.
La nochada se termino kon un kon konserto de Yinon Muallem.
Alhad demanyana mansevos, mansevas, ombres i mujeres partisiparon a las konferensyas ke determinaron de antes, a los sujetos ke les va enteresar lo mas muncho.
Kon mi amiga endjuntos partisipimos a una konferensya de “Alegre Benardete” ke es una terapista de la respirasyon. El nombre de esta atelye fue;
“La Respirasyon Transformal”.
Una klasa yena de personas i lo ke me sorprendo (şaşırttı) lo mas muncho fue la partisipasyon de ombres de edades diferentes. Fue muy reushido sovre el sujeto ke no savemos respirar komo kale, i mos ambezimos ke ande no ay la respirasyon, ay desrepozos diferentes.
A kavza de espanto, ansya, inkyetud (endişe) i stres no estamos puedyendo respirar korektamente.
Si respiramos djusto; bivimos kon kerensya, kon felisidad i enerjikamente.
Mos ambezimos munchas kozas enteresantes komo ke; respiramos 28.000 vezes en un dia. La respirasyon ke se detyene kree un blokaj, komo deven de respirar los esportivos (spor yapanlar) i munchos otros detalyos emportantes.
Los 50 volontaryos i volontaryas del “LİMMUD” dia entero estuvyeron koryendo de un lugar al otro para pueder ayudar a las 1000 personas en todo modo de sujeto. Midi i noche aparejaron a komer kon una organizasyon ekstraordinarya. A parte del komer; en todos los etajes, en los kafes; ofryeron (ikram) bevyentas yeladas, çay, kafe, kozas dulses i salados.
En una ora aviya dyes diferentes aktivitades. No supimos ande iyir, tanto todo estava enteresante i yeno de djente.
Despues de komer asistimos a una prezantasyon de “Hamdi Bey i las Tartugas” (kaplumbağa); un pintor (ressam) famozo i konosido por el mundo entero.
“Tanya Bahar” prezento este pintor en dando detalyos de su vida i azermos konoser sus tablos, pinturas de kolores i de sensos diferentes.
“Tanya Bahar” ke lavora en el muzeo de Pera i ke aze su echo kon muncho plazer; kon su boz dulse i mirada entelijente; izo una demonstrasyon reushida de este pintor, ke era un arkeolog i el fondator (kurucu) del “Muzeo de Arkeolojia” de Estambol. Fue el direktor 29 anyos de este muzeo de arkeolojia.
El es uno de los primeros pintores en la pintura turka ke utilizo las figuras (figür) en su kompozisyon i paso a la istorya. Fue una ganansya (kazanım) para mi de konoser este pintor selebro.
Despues asistimos a la konferensya de un istoryano (tarihçi), eskritor de viajes (seyahat yazarı) i un giador (rehber) ke rezumo la istorya de los djudyos de Turkiya en komparandola kon la istorya jeneral (genel tarih).
A la fin la avla del “Rav İsrael Meir Lau” en el sujeto: “La Emportansa de la Erensya Djudiya”.
En su avla disho: “Todas las grandes sivilizasyones (medeniyet) se desparesyeron fina oy, ma; malgrado el “Holocaust”, los progromes ke sureyaron anyos largos, la engizisyon, los egzilos (sürgün); el Djudaizmo kontinuo fina oy grasyas a las tradisyones, a la mizma lingua, al mizmo tallet i al mizmo tefillin.
Kualo aze a un djudyo un puevlo? Las tradisyones i las reglas komo; la Brit-Milla, Bar-Mitsva, el seder de Pesah, el shofar de Rosh-Ashana, Kipur i Hanuka.”
Esta avla fue a la memorya de “Yoel Ülçer” (z.l.), ke peryo su vida en el atako de la sinagoga Beith-İsrael en el anyo 2003.
Ke su alma repoze en ganeden.
El grupo de muzika de la eskola mos dyo un konserto inolvidavle a la fin del dia.
Antes de terminar kero felisitar el grupo del
“LİMMUD” por sus perseverensyas,por sus kapachitades i por sus lavoros de aryento del korason i por el rezultado de la kontentes de todos los partisipantes.
De mijor a mijor komo kada anyo...
