Noche de Alhad, despues la fin del sakro repozo del dia de Shabat, Benyamin Netanyahu prezento ofisyalmente al prezidente Shimon Perez la lista definitiva del futuro governo de Israel, el kual sera el sigyente:
LIKUD
El partido del Primer ministro Benyamin Netanyahu tendra la responsabilidad del ‘Ministeryo de la Defensa’ ansi kel de “Los Echos interyores”.
Tambyen, asta la fin del procheso de Avigdor Lieberman, leader del partido nasyonalisto “Israël Beiteinou”, el prezidente del Governo va asumir la responsabilidad del Ministeryo de las relasyones eksteryoras.
YESH ATID
El partido sentristo de Yair Lapid, obtuvo los importantes Ministeryos de “Las Finansyas”, de“La Edukasyon” i tambyen de “La Salud”.
HABAYIT HAYEHUDI
Este partido muy nasyonalisto de Naftali Bennett, va tener la karga de los Ministeryos sigyentes: “Komersyo i Industria” ansi ke “Alojamyento (moradas)” lo ke para el es krusyal, visto la insesante kontroversya de las muevas konstruksyones en las Kolonias.
HATNOUHA
Tzipi Livni (prezidente de este partido) es kargada, eya, del “Ministeryo de la Djustisya” i tambyen de las futuras negosyasyones de Paz kon el Estado Palestinyano”.
El tema prinsipal de su kampanya elektoral fue “la nesesidad absoluta de la kreasyon de un Estado Palestinyano İndependyente”, tema ke repoza sovre una realidad inkontestavle: Un “Grande Israel” el kual kontyendra endjunto İzraelyanos i Palestinyanos, prezentara ovligatoryamente para Israel dos riskos mayores, el uno sekuritaryo, el otro (en el futuro) identitaryo...
Kel Sinyor de los Syelos bendiga Israel i su Governo i lo ayude a eskojer el kamino el mas djusto, el kamino de la Paz.