Batya Natan

16-20 Mayo 2012 aktividades

16-20 Mayo 2012 aktividades

Ansi ke se anunsyo, se organizo entre estas datas, aktividades konsernando Tradisyones Sefardis folklorikas komo Muzika i Gizado Sefardi. Son importantes valores tradisyonal de muestro Patrimonyo, ke reushimos mas o menos a konservar.

Yo syempre pensi ke muestra idioma, el Judeo- Espanyol es el elemento presyozo de este patrimonyo. Es…o era?.. Oy, estamos ovligados de achetar la realidad i azer “Mea Kulpa”. No reushimos kompletamente a kontinuar la ovra de muestras madres. Savemos muy bien ke en el korso de la Istorya, fue la Madre Djudia  ke se enkargo el prinsipal rolo en la konservasyon de muestra lingua. Mo la ambezimos tan bien de “Boka de Madre”, ke no tuvimos menester de dinguna regla de gramera.

Mo la ambezimos tan bien ke, despues de tantos siglos fuimos kapaches de emplear la idioma de muestros padres. El Judeo-Espanyol o el Ladino komo se esta nombrando muy frekuente, es la lingua de la “Nostaljiya” i del “Egzilo”. Es la lingua ke avlavan muestros ansestros arrondjados de la Espanya. Se puede dizir ke el J-E, nasyo de una manera, del vezindado de los Sefardis kon muzulmanos, gregos ets.. en la anchas Tyerras Otomanas. Es por esta razon ke uzi el byervo “Egzilo”.

Orozamente, tenemos i otras valores, rikezas, uzos folklorikos, komo “Muzika” i “Gizado” Sefardi. El 16 Mayo demanyana, entre 10.30-13.00, en el Instituto Cervantes de Taksim, ay una konferensiya i “Meza Redonda” sovre la Kultura Kulinarya Sefardi, los problemas konsernando su transmisyon a las muevas jenerasyones..

El mizmo diya, en la kozina de “Casa de Barınyurt”, se va realizar el “Tayer de Gizado” (workshop) entre las oras 14.30-17.30. Los lektores de Estambol ke en jeneral resiven el “Şalom” akel diya demanyana (16 Mayo) pueden apanyar la shans de alkansar a estas aktividades. Por detalyos suplemanteryos aderesarsen a:

Emel Benbasat (Sentro Sefardi de Estambol) tel:0212 231 92 82 /ext.132

Ana Lobato (Instituto Cervantes) tel: 0212 292 65 36 /ext. 101

Kon el eskopo de kedar en el kuadro de muestro sujeto, kero avlar de Salonika, sivdad ke abrigo durante siglos, la mas grande Populasyon Djudia despues la Ekspulsyon.  Fueron Fidel a sus tradisyones, a sus uzos i kostumbres. Aki kero sitar unos, dos paragrafos del livro “Usos y costumbres de los Sefaradis de Salonica” del Sr. Michael Molho: “Aun ke no eran ovligados de kedarsen en Gettos, eyos preferavan bivir aparte de los Moslem i Kristiyanos, en sus propias “Maales”. Biviyan en kazas entornando anchos “Kortijos”, kon el pozo, i munchas vezes el mupak en medyo…”.

Keridos lektores, aki no me pude impedir de akodrarme de mis vakansas ke pasava en mi chikes kon la ancha mishpaha de mi madre en Tekirdağ. Los kortijos, el pozo, las guertas, la Maale Djudia … Esto todo es tanto familyar para mi, ke por un momento me vide ayi, ijika chika en  anyos de Gerra, los 40...

Kontinuaremos las sitasyones del Sr. Molho: “Las fachas de las kazas eran feas. Par kontra al interyor todo era alegre, limpio, las paredes de un blanko-blu, enkaladas kon “Kirech” (kal). Entre los arvoles, se viyan flores, trandafilas, i yasemines dando un parfum delisyozo.”

“Los platos i atakanos de mupak eran en“barro”. Los objektos relijyozos, el “Kandelar”de noche Shabbat eran lo mas en plata. Entre los platos ke gizavan aviya “bamia”, berendjena, espinaka, apyo, “fijon”(fasulya) ets.. En desparte de las “Kiftes” komiyan kodrero solo entre Avril i Mayo. En el dezayuno, al lado del pan i kezo, biskochos i aviya las “Burekas”, boyos i guevos haminados…”.  

Vinyendo a las aktividades del 19-20 Mayo. El Sentro Sefardi de Estambol kon el Instituto Cervantes i la kontribusyon del Orfelinato, prezentan Shabbat el 19 de Mayo a las oras 20.30, el konsierto de “Kantikas de Boda” performado por el “Ensemble Saltiel” en el Amram Auditorium – ULUS.

El 20 Mayo entre  las oras 16.00-18.00 esta programado el “Tayer de Muzika”. Por mas enformasyon, los mizmos numeros de ariva. En metyendo el punto final, espero toparmos en esta pajina a la semana ke vyene. 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
598