Batya Natan

ERA un tyempo en PORTUGAL… -2

(Los Ultimos Marranos)

ERA un tyempo en PORTUGAL… -2

El eskrivano espanyol Felipe T. B. De Quiros, en su lavoro “The Spanish Jews” (Djudios Espanyoles) dize: “Nasyones komo Fransia, Republikas Italyanas i el Portugal, syempre kritikaron los Monarkos Katolikos Espanyol por sus “krueldad i indjustisya”. Portanto eyos tambien arresivyeron kon ostilidad los djudios ekspulsados de Espanya”...

El Portugal abrigo al presipyo kaji 90.000 Sefaradis ekspulsados de la Espanya. 4 anyos, entre 1492-1496 no se konvertyeron al Katolisizmo, bivyeron una vida de egzilados, de “Diaspora”. Entervalo, el Duke Béja paso al trono kon el nombre de Rey Manuel (1495-1521). Sigiendo una politika de aserkamiento kon la Espanya, izo matrimonios kon prensesas espanyolas i tambien, en 1496 publiko el “Dekreto” forsando los djudios a la “Konversyon” o “ Ekspulsyon”.

En 1996, 500. aniversaryo del Dekreto, en Portugal se organizo seremoniyas de komemorasyon, ande el Prezidente Dr. Jorge Sampaio (el tambien, de raiz djudia) rekonosyo ofisyalmente la egzistensya de la Inkizisyon Portugeza.

Oganyo, el 19 Avril 2012 es diya de Komemorasyon de la “Shoa” (Getto Varshovie), de la mas grande trajediya ke konosyo el Puevlo Djudio, del “Genocide” del 20. Siglo. Par un grande azardo, 19 Avril 1506 es la data de un otro masakro masivo en la Istorya Djudia. En 2006, en el 500. aniversaryo del  masakro de los djudios de Lisbona, se organizo seremoniyas a la memorya de los djudios ke fueron asasinados en las kayes de esta sivdad. Se inoguro el monumento simbolizando los asasinatos ke kontinuaron durante tres diyas. En los dikorsos se ponktuo la importansa de nunka olvidar esta pajina oskura de la Istorya del Portugal.

Istoryanos dizen: “Esto fue el Primer Pogromo de la Edad Moderna”. Unos dos mil konversos fueron asasinados por sus vezinos kristiyanos. Las viktimas, en mayoriya eran ekspulsados del Reynado de Kastilya i Aragon, refujyados en Portugal en 1492.

Esto fue el empesijo de la Istorya trajika de los Marranos del Portugal, el  masakro, la Inkizisyon i la Ekspusyon. En 1492, el Egzodyo de la Espanya fue grande i “masivo”. El de Portugal no fue identiko. Empesando en el 16. Siglo, kontinuo asta la mitad del 19en. En mayoriya los djudios emigraron a Fransia, Olanda, Alemanya, Beljika, Italya ( Livorno, Venezia, Floransa) i una grande partida, Saloniko i Estambol. En el Imperio Otomano los djudios fueron liberos de pratikar sus Fey i ritos relijyozos, sus tradisyones i kostumbres. Syertos Marranos ekspulsados se instalaron en el Norte de la Afrika, o se fueron mas leshos, komo por egzempyo a las Antillas Olandezas, ets…

Komo ya remarkariya el lektor, en el titolo de mi teksto ay la ekspresyon “Ultimos Marranos de Portugal”, deke??. En el presipyo del 20. Siglo, los Marranos de Belmonte, los ultimos del Portugal ke aviyan konservado durante 5 siglos, sus fidelidad a la Ley de Moshe, biviyan arrankados del mundo eksterior. Eran siguros de ser eyos, los ultimos djudios asta ke Barros Bastos, un kapitano djudio de la Armada Portugeza, los deskuvrio i les revelo ke diversas Komunidades Djudias biviyan oy en diya en diferentes partidas de la planeta.

Mizmo en sekreto, los djudios de Belmonte komo pudyeron konservar sus Djudaismo debasho la Inkizisyon? Es una pregunta difisil de responder en detalyo a muestra kestyon en este espasyo limitado. En los 1920 uvo komo un despertyamiento en el Norte del Portugal, los djudios preguntandosen “porke aziyan syertos ritos komo asender vyernez la noche a las eskondidas metyendo la kandela aryento un vaziko?”... Belmonte, leshos de las grandes sivdades i kon sus prove revenidos no era atraktivo en los ojos de la Inkizisyon. Esto puede ser una de las repuestas a la kestyon de ariva.

En el 2005 los djudios de Belmonte, kon la prezensya del Sr. Jorge Sampaio inoguraron el “Muzeo del Criptodjudaizmo”, en komemorasyon de las Komunidades forsadas a konvertirsen. Belmonte es un muzeo bivo. Abriga un sentro uniko de dokumentasyon del “Criptodjudaizmo”, ay aki famiyas de “Konversos” djudaizantes. Son los Ultimos Marranos del Portugal…  

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
583