Porke te yamas Miriam i no Ester?... Deke tengo el nombre de mi Nona?, demandava en mi chikes...Mis avuelos maternal teniyan 26 inyetos. Munchos Nisim (mi Papu) i Fortune (Mazaltove, mi Nona).

" />
Batya Natan

Komo te Yamas?...

 Porke te yamas Miriam i no Ester?... Deke tengo el nombre de mi Nona?, demandava en mi chikes...Mis avuelos maternal teniyan 26 inyetos. Munchos Nisim (mi Papu) i Fortune (Mazaltove, mi Nona).

Ansi, me ambezi ke damos (o uzavamos! a dar) nombres de avuelos, en vida o no... Afilu, en una de sus kantikas Enrico Macias dize: “...Le prénom de ton grand-pere..”. Si no me yerro, los Ashkenazis dan nombres de avuelos ke no biven, por onorar sus rekuerdos. Entre los inyetos de mis avuelos maternal ay tambyen syertos del nombre David,  ermaniko de mi madre ke no konosi syendo ke muryo muy mansevo...

Aktualmente en famiyas, diremos “konservativas” la tradisyon esta kontinuando en muestra Komunidad. Ma, en grande mayoriya estamos dando a los muevos nasidos, nombres a la moda. Estos propozitos no syendo de karakter personal, no reflektan dinguna kritika. Porke penso, no es solo el nombre ke importa. Es la alkunya ke aze distinguir los miembros de kada mishpaha. Es el “Nombre de Famiya” ke se transmete de jenerasyon en jenerasyon.

İze bushkidades simplemente para satisfazer mi kuryozidad. “Alkunya” komo munchos byervos de muestra lingua es tomado del byervo Portugezo “Alkunha” i esta nosyon aparese en diversas kulturas. En la Kina por egzempyo, kon Orden İmperyal, mizmo antes el Kristo, uvo ovligasyon de tomar un nombre de famiya, para transmeter de padre a ijo. En paises komo Fransiya, İngleterra este prosesus se desvelopo a partir del 16. Siglo. En syertas kulturas la alkunya se instalo munchas vezes kon leyes. Asigun lo ke meldi, en Turkiya los Djudios en jeneral, fueron defendidos de tomar alkunyas utilizadas por Kristiyanos.

Aki, tuve dubyos porke komo savemos, los Sefaradis de Espanya ya teniyan alkunyas  antes la “Ekspulsyon”. Muestros ansestros es ke no uzavan sus alkunyas ke se trusheron endjuntos?.. Todos konosemos las alkunyas komo: De Toledo o Toledano, Sevilya, Saragosi, Albukrek, Kordova ets... Alkunyas evokando la Peninsula İberika. Aki, otomatikamente pensi a la ilustra famiya Nasi (Mendes), Dona Grasia (1510-1569) i su sovrino Joseph (1515-1579). Bivyeron una peryoda de sus vida en el İmperyo Otomano, kon el ayudo i proteksyon de Sultan Soliman el Manyifiko. Joseph Nasi fue un amigo del Prens Selim, konosido komo Selim II despues ke paso al trono...

Bueno... Ay tambien alkunyas ke fueron dadas o “trokadas” kon la “Ley de Alkunya” del 1934. Es ke uvo difikultades de achetar i emplear alkunyas muevas?.. Diskutyendo sovre esto, mi marido me konto ke su Papu era Levi. Pretendyendo ke aviya munchos Levi’s fueron ovligados por el “Dekreto” de 1934 a tomar la alkunya Delevi. Esto es un detalyo ke me ayudo a aklararme un poko..

En mis anyos de Galata, konosimos la famiya Mayorkas. Una alkunya ke me maraviyava. Kon mi entendimyento de kriatura me selava porke no teniyamos mozotros este modo d’alkunya!.. A la fin, mi Padre (b.m) fue ovligado de eksplikarme ke kada uno teniya  la alkunya de sus ansestros. İ ke probavlemente, los Papus del Sr. Mayorkas eran antes la Ekspulsyon orijinaryos de la isla Mallorca.

En el dokumento “ Los Djudios Desconosidos”, meldi kon enkanto ke nombres ilustros, de una manera, pueden tener raizes judias. Por terminar, aki vo dar un paragrafo  del livro “El Siciliano” de Mario Puzo:

(*)“... Orgolyozos, kada famiya pintava la kaza de la mizma kolor ke sus padres. No saviyan ke la kolor  era una aluzyon a sus orijines, a la sangre  ke aviyan eredado de sus antepasados. No saviyan ke los Gregos utilizavan el blu, los Arabos el roz o el kolorado. Par kontra, los Djudios uzavan el amariyo. Sin dubyo, todos eyos se konsideravan “Sidjilianos”. Las sangres se aviya mesklado tanto al korso de los siglos, ya no se pudia identifikar el proprietaryo de una kaza. Si alguno uvyera dicho al balabay de una kaza amariya, ke teniya ansestros djudios, pudriya terminar kon una navaja en la tripa!...”

Es triste reelmente, las sangres ke se mesklaron. Esta inkyetud miya no tyene dinguna semeja de “Rasismo”. Es solamente la ekspresyon del dezeo de konservar muestra rasa ke ya dyo milyones de pyedritas durante el “Holokosto”.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
556