Ay de esto unos kuantos dias, tuve la oportunidad de vijitar, en el muzeo militar de Harbiye, la remarkavle egzibisyon de un muevo medyo de ekspresyon artistika, kompuesta en mayoridad de ovras sinyadas por Eti Kohen, ansi ke de sus kolavoradoras Aybükem Azaklı i Semra Özkan Boydaş.
Devo konfesar ke a mi grande sorpreza, me topi delantre un arte ke personalmente no konosia.
Ekskluzivamente figurativas, munchas ovras ekspozadas se kompozan de temas pikturales de ansyanas minyaturas otomanas, otras mas raras de sujetos personales, todas egzekutidas kon varyos pedasos de teshido (kumaş) de talya, forma i kolores diferentes.
Un djenero de “Patch work” van a pensar syertas personas. No i Si.
Asta poko antes, “Patch work” sinyifikava para mi ‘lavoro manual de orijen kampanyarda, echo byen entendido kon muncha minusia a la mano, kon diferentes pedasos de varyas estofas, para konfeksyonar kuvyertas de kama o otros objetos similaryos de kaza.
En la dicha egzibisyon ke vengo de vijitar, me topi delantre realizasyones de un nivel artistiko byen diferente; lo ke me aze pensar kel instikto estetiko tyene la posibilidad de entrar al servisyo del arte kual ke sea el materyal utilizado: marmol, kovre, pintura o simple pedasikos de estofa uzual.
Penso ke despues poko tyempo, vamos ver kompozisyones muevas, de inspirasyon ekskluzivamente personal i enteramente otonoma.
Toda mi admirasyon por el lavoro de Eti Kohen i de sus kolavoradoras i dishiplas.
