Un livro esta azyendo en este momento un ruido terrivle en Fransya i tambyen en otros payizes del mundo oksidental, trespasando de muncho las normas abituales de vendida.
No tuve ainda la posivilidad de meldarlo porke no se realmente ande pueder prokurarmelo, por kontra tuve la okazyon de topar fragmentos del teksto ansi ke varyas opinyones a su sujeto en el sityo Wikipedia, i sovre todo oyi en la televizyon Franseza dos grandes pensadores reputados por la profundura de sus djuzgamyentos “Luc Ferry” i “Jacques Julliard” ke kritikaron la utilizasyon del termo “indignez vous” atribuido a situasyones ke realmente no meresen de ser denigradas a este grado…
El livro en kestyon es intitulado “Indignez vous” i sinyado por Stephan Hessel, autor fransez aedado de 93 anyos, ijo de un padre djuydyo l una madre kristyana, todos los dos de orijen Almana.
El autor konosyo i partajo parsyalmente, durante la epoka nazi, el suerte trajiko ke fue rezervado a sus ermanos djudyos en los kampos de la muerte, ma pudo eskapar por milagro de una fin trajika i mizmo partisipar a la rezistansya kontra el enemigo. A la fin de la gerra, el fue konsiderado komo un grande humanisto i kolavoro al lado de René Cassin a la redaksyon de la “Deklarasyon de los Derechos del Ombre”.
El koste del livro es muy basho, manko de 3 Euros; el es muy kurto i fasil a meldar, ma vizivlemente demagojiko i parese kerer atizar la ravya impulsiva de una grande parte de la manseves aktual, furyoza kontra las difikultades a las kualas eya se topa enfrentada...
Se trata de una ovra ande se puede persivir un djenero de insitasyon a la revolta kontra la governansa aktual de Fransa ansi ke kontra las inegualidades entre las differentes klasas sosyales, lo ke “es o no es” su derecho... ma tambyen de una kritika virulente kontra Israel i su politika.
Por seguro ke “dar su opinyon”, “revelar kualkyer falta” es el derecho de todos, ma en bazando sus akuzasyones sovre realidades i en tomando en konsiderasyon las sirkunstansyas en las kualas los faktos se pasan...
Deke derecho, arrebashar sistematikamente a este grado, sin bushkar ninguna sirkunstansya atenuante, una populasyon entornada de payizes hostiles a su egzistensya i ke resyente el menester de defenderse...? La ekspresyon “indignez vous” es muy desgradante komo lo afirma Luc Ferry. Se puede denunsyar los yerros, ma nunka humilyar sin tomar la pena de analizar objektivamente la situasyon.
Este grito “indignez vous... “es komo un djenero de grito de odyo, de “aborresimyento de si mizmo” ke desde un syerto tyempo devino kaji una kostumbre para varyos intelektuales djudyos...
Es ke se trata de un renyegamyento de la dinyidad de su orijen? o byen de una revendikasyon severa en direksyon de un puevlo ke yeva en el “un mensaje bibliko”, sublime en su esensya ma imposivle a realizar delantre la voluntad de anihilasyon de los payizes ke lo entornan?
