Batya Natan

BO

Sigun konta en la perasha de la semana pasada en el entervalo de un anyo, mando el dyo dyez yagaz una mas fuerte. Ke otra a el Ejipto. Enprimero se trokaron las aguas en sangre, i muryeron. Los peshkados del riyo. Despues se muchiguaron en el riyo. Las ranas, ke salyeron de las aguas i kavzaron munchos danyos en la tyera. İse konkriyo piyojos muy donyozos i se ve unos animales krueles i uvo una muertaldad en las kuatropeas ke izo muncho danyo. Una fuerte sarna les vino a todos los ejipsyanos asta no pueder süportar i uvo un buen pedrisko ke danyo todas los frutos del kanpo.

I en la perasha “Bo” de esta semana meldamos la kontinuasyon de la yagas ke son la langosta. Ke baryo todo lo sembrado. Despues les mando el Dyo una fuerte i espesa eskuridad ke turo tres diyas i tres noches de una manera ke los izo kevrantar muncho, syendo no se puediyan meneyar, kada uno de su luguar. Todos estos males fue süportando el kruel paro en tal de estar en su kapricho i no mandar a los djudyos de su tyera.

Kuando se apezgava la fortaleza de la yaga sovre el i su puevlo, ya paresiya ke iva ablandar su korason i ya prometiya de dar la libertad a los djudyos. Apenas kalmava la yaga i teniya un poko repozo, se enduresiya su korason. De esta manera süporto paro i todo su puevlo estas mueve yagas myentres ke todos los djudyos, estando mismo mesklados kon los ejipsyanos no teniyan ningun mal.

La dyezena yaga (makat behorot) ne pudo süportar asta el kavo, despues de sufriyir bastante ke todos los ijos meyores (behorot) de los ejispyanos, de chiko asta grande, fin el ijo de paro, muryeron todos de una en la medya noche i fue forsado paro de parte su puevlo de yamar en akel momento a Moshe i a Aaron rogarles ke salyeran eyos i todos los djudyos del Ejipto, i ke rogdran por su vida.

En la medya noche del 15 Nisan de este anyo, mando a dizir a todo el puevlo djudyo ke se topavan en la tyerra de Goshen. Ke eyos eran liberos i ke puediyan salir de su pais. Los djudyos ke ya estavan prontos esperando esta ora; se rekojeron todos kon prisa en Ramses. A la manyana enel 15 Nisan salyeron todos los djudyos del ejipto kon grande koraje i alegriya despues de aver estado en el ejipto 210 anyos.

La suma del puevlo ke salyeron del ejipto era 600 mil almas de ombres de 20 anyos para ariva, endesparte de mansevos manko de 20 anyos i de mujeres i kreaturas.

Los ejipsyanes konosyendo a los kavos la grande endjustisya ke kometyeron kon los djudyos, i tambien ke vyeron ke ay dyo en los syelos, ke paga a kada uno sigun sus echas, kijeron afalagarsen un poka kon eyos, i fueron regalandoles muncha plata i oro i pyedras presyozas i munchas kozas valutozas i les aziyan demandan todo lo ke teniyan menester. Ansi salyeron los djudyos de mistrayim kon muncha rikeza. Sigun sela prometyo el todo poderozo a Avraam. Kuando le avizo lo ke teniya ke arivar a sus ijos. Komo esta eskrito enel livro bereshit kapitolo 15 “İ disho a Avram, saver sepas ke tu semen sera peligrino en tyera ke no es suya, i los aran sirvir, i los afriyiran. I tambien a la djente ke los izyeron sirvir djuzgare yo, i despues de esto saldran kon ganansya grande.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
1290