Batya Natan

Galata o Nişantaş? -2

Galata o Nişantaş? -2

La semana pasada konosimos el aspekto muevo de Galata. Syertas kozas trokaron, d’akordo. Mizmo si troko de facha, Galata va kedar syempre un distrikto istoriko muy enteresante. Esto lo konstati otruna vez en el torno ke ize el 25 Desembre, kuando enkontri tantos turistos en kada kaleja, afilu ke ya aviya eskapado el Festival “Galatamoda”. Nişantaş no puede rivalizar kon el aspekto istoriko de La Kula... De toda manera (zaten) fueron istorikos de manera diferente. Galata, el derredor de la famoza Torre, es el distrikto ke abrigo una grande Populasyon Djudia... Al grado de ser kalifikado de “Ghetto” por syertos istoryanos. No es djusto, porke Galata nunka fue un geto en el senso propio del byervo. Yo me engrandesi, me fui a las eskolas aki i meldi djuntos kon elevas muzulmanas.

Vinyendo a Nişantaş... fue sentro rezidansyel de los “Pashas” de  Sultanes Otomanos, lugar preferido de notavles muzulmanos en los anyos 1800 i en el final del İmperiyo. Oy mizmo, un buen observador puede ver aki, en Teşvikiye o por Machka, egzempyos maraviyozos de arkitektura. Fraguas kaji antiguas ke malorozamente s’estan pyedrendo entre los imobles modernos sin dinguna partikolaridad arkitektural.

Bivo en Nishantash ay kaji 57 anyos. Alkansi ver unos, dos “köshkes” aryento guertas, en el korason del distrikto. La fragua de tavla enfrente la kaleja indo al Ospital Amerikano era el “Kindergarten” del Liseo Şişli Terakki, ande  mandi mi ijo en los anyos 58-59. Aviya otras rezidensyas semejantes, ansi ke kampos vaziyos en las chikas kolinas (tepe) serka de ande moro aktualmente.

Nişantaş todo en konservando su fama de sentro rezidansyel, se izo tambien un sentro gastronomiko kon sus restoranes i kafes... Despues de 57 anyos, es ke me devo konsiderar komo vyeja “Nişantaşliya”?.. Puede ser si, puede ser no. Ke importa?! Yo syempre en mi korason kontinui a ser “Una İjika de Galata”.

Nişantaş, adjustando a su fama gastronomika, esta en el kamino de azerse un sentro de moda internasyonal. Las markas luksuozas de New-York, Milano s’estan entresando al distrikto, al grado de avrir sukursalas aki. El direktor de una nombrada kaza de moda Milaneza, komparo Nişantaş a la famoza kaleja Montenapoleano de Milano. En repuesta a una kestyon sovre sus preferensa, afirmo: “Vide ke Nişantaş es el lugar ande esta chapteando el korason de la moda, d’artikolos de lukso. Los kafes i restoranes, las iluminasyones me enkantaron. Ay aki una intensidad de damas i sinyores “chic”i aldikeras yenas!..” Keridos lektores, ay munchos ke pensan komo este sinyor, ma no es ansi. Kero dar las palavras d’un fonksyonaryo de muestra maale: “En realidad el verdadero morador, el nasido de Nişantaş, Teşvikiye, Maçka, no es muy riko.” No comment!

Espesyalmente, vyejos moradores o los ke nasyeron aki estan un poko keshozos del estado muevo de Nişantaş. Estan bushkando el kalmo nostaljiko de los diyas de sus manseves. Asigun el fonksyonaryo ke avli, no son los moradores, ma los ke vienen d’afuera durante el diya entero, las tadres i la noche a pasear, komer o tomar un kafe, ke forman esta muchidumbre de djente. En las kazas, los ke biven aki son komo 25.000 personas. El diya en las kayes, ofisyos, en magazenes luksuozoz o restoranes i kafes, este shifro puja asta 150.000.

Enfrente el aspekto aktual del distrikto, munchos se demandan: Es ke Estambol puede ser una Kapitala de Moda? Los espesyalistos de la kestyon responden ke no es muy fasil de ser komo Paris, New-York, Milano, a lo menos dayinda unos kuantos anyos. Ma se puede afirmar ke muestra sivdad es la “Kapitala del Shopping” kon  sus magazenes o sus grandes firmas internasyonal de lukso i los jigantes “Shopping Center”s. De Nişantaş, sentro de luzes i flores vos sueto otruna vez, una anyada de paz, repozo i salud.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
606