|
El nivel intelektual de muestra komunidad se esta inkontestavlement enaltesyendo a un ritmo intensivo desde 15 o 20 anyos ... munchas mas manifestasyones kulturales i artistikas avyertas al publiko son organizadas, konferensyas, konsyertos, egzibisyones pikturales i lo ke es muy importante, una asistensya de mas a mas grande, de mas a mas konsernada por temas para eya muevos, un menester kolektivo de konoser, entender, ambezar, entrar en los espasyos anteryoramente rezervados a una chika minoridad. Ansi, Alhad pasado el “Limmud” fue una konfirmasyon flagrante de esta asensyon, kon la rikeza de su programa indo de los sujetos los mas ermetikos asta los ke mos paresen fasilmente aksesivles, kada uno kon su kontenido propyo. Ansi, tambyen, nasyo un maraviyozo fenomeno, “el faktor kultural empeso a remplasar el faktor sosyo-ekonomiko en las relasyones entre las personas”. Al dezir de los ke pudyeron asistir, Alhad fue un dia de fyesta para el esprito: ...oras de enrikesimyento kultural, alegria de pueder asistir al entusyazmo jeneral, programa muy ekilibrado en su variedad, aparejado kon intelijensya i sensivilidad...avladores turkos i estranjeros de alto nivel, por la mas parte universitaryos... Una organizasyon perfekta asumida por un komite vizivlemente de alta valor, sensivle i dinamiko. Kontribusyon de varias asosyasyones i myembros de muestra komunidad, lo ke atesta sus interes para semejantes manifestasyones i lo ke es un sinyo probante i muy pozitivo del adelantamyento de muestra komunidad. |
