Alüminyum Hurda Geri Dönüşüm

Un aniversaryo - 8 Marso i la mujer Sefaradi

Un aniversaryo - 8 Marso i la mujer Sefaradi

Keridos amigos, komo lo savesh muestra revista “El Amaneser” viene de kompletar su 4. anyo. Reelmente es un rezultado ke mos da kontentes ansi ke orgolyo. Si esto lo konsideramos tal ke una reushita, yo la kero partajar esta reushita kon todos vozotros, keridos lektores. Syempre lo eksprimi, i lo  esto repetando, es vuestra fidelidad, vuestras kritikas pozitivas ke mos dan la fuersa  i el “doping” para kontinuar en este kamino.

En vezes me digo, si la kerida Karen no aviya tomado la inisyativa de kitar una revista, es ke “El Amaneser” iva naser?... De una manera, digo ke si. Porke Karen de mezes antes ya estava azyendo tentativas, proyektos de publikar una revista. İ por esta razon, siguro ke no esto enyegando su rolo prinsipal. Ma, devemos achetar i el presyozo lavoro de la admiravle Güler Orgun. Syempre efikache, syempre pronta a ayudar, aun ke prefera lo mas del tyempo, kedar un poko en el “arriere plan”.

Kada presipyo de Marso selebramos el aniversaryo de “El Amaneser”. Kon una oroza koensidensya, en estos mizmos diyas, en el 8 del Marso se selebra tambien el “Diya İnternasyonal de los Derechos de la Mujer”. Ya tuve munchas okazyones de eskrivir aki, artikolos sovre este diya. Tekstos referandosen en  jeneral a las aktividades en el mundo entero i espesyalmente en muestro pais. Kualos son estos derechos ke se avlan tanto? Kon su simple definisyon son: La totalidad de los derechos ke asiguran a la Mujer, una igualidad kon el Ombre en todos los domenos de la vida komuna i kollektiva. Son derechos fundamentales akordados por organizasyones internasyonalas i legalmente protejados por dokumentos.

Bueno, kuantas mujeres reusheron a obtener estos derechos?.. Puedemos responder: “Munchas”, egzakto, munchas ma no todas. Porke, teorikamente la igualidad parese egzistir ma no se esta vyendo syempre en la pratika. En syertas komunidades por egzempyo, syertas presyones tradisyonal o relijyozas pueden ser obstakolos delantre la emansipasyon de las mujeres. Es un sujeto bastante ancho, kon munchas fachas ke no se puede analizar en este espasyo limitado.

Par kontra estamos vyendo ke en munchas partes del mundo la Mujer kumplio grande evolusyon. Mizmo si por la ora son en minoridad las estamos sigiendo en diversos terenos profesyonal. En la Administrasyon, Politika, Medikeriya, en la Media vizual i eskrita ets... Este tablo pozitivo mos glorifika i mos da grande plazer.

Yo eskarvi par azardo, unos kuantos numeros de muestra revista. Remarki aparte del kuadro de eskrivanos bazikos, ay una mayoriya de sinyaturas femininas. Esta konstatasyon miya puede no tener grande importansa para syertos. Ma para mi eksprime la evolusyon de la “Mujer Djudia” en jeneral, i de la “Mujer Sefaradi” en partikolar, partisipando al adelantamiento de muestro Siglo. Devo tambien sitar las damas, las muchachas lavorando en el korso de la semana entera para kitar muestro jurnal, el “Şalom”. Aki por siguro ke no es posivle de enumerar todas las mujeres valorozas de la Diaspora i de aki... De las ke estan tambien partisipando a la “Misyon” de propajar la Kultura Sefaradi...

Naturalmente la emansipasyon de la Mujer Djudia no es limitada kon lo ke eskrivi mas arriva. Semos testigos de la evolusyon de muestras ijas, muestras inyetas (futuras madres) ke mos glorifika. Tyenen la libertad, la shans de azer altos estudyos para aparejarsen una karyera, para lavorar... Lavorar... uno de los derechos fundamental de la persona, seya del Ombre, seya de la Mujer.Kero terminar kon mis suetos para una fyesta de Purim alegre.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın