Batya Natan

Suplemento del dosye “Estambol 2010”

Kuando eskapi el dosye sovre Estambol (“El Amaneser” No. 44), pensi de kontinuar unas, dos semanas kon el mizmo sujeto en el “Şalom”. Porke malgrado el espasyo (portanto bastante ancho) no pude transferar todas las notisyas ke aviya tomado myentres mis lavoros de bushkidad sovre la tema. Oy, lo ke vo relatar puede ser ke no son entonses novelas muy “freskas”, ma esto sigura ke no peryeron de sus aktualidad i importansa.

Komo se save, La Munisipalidad de Estambol se esta aparejando para el anyo 2010, en tal ke kandidata. En el kuadro de estos aparejos para su nominasyon de “Kapitala Kultural Evropea del anyo 2010”, muestra Munisipalidad avyo el “Sentro d’Estambol” en la Evropa. El Sentro esta aktuando en Bruxelles, sivdad konosida komo el “korason” del kontinente evropeo. Asigun ya devemos saverlo, poko tyempo despues, Estambol espera ser nominada komo una sivdad importante en los domenos kultural i artistikos. Esto es un prosesus ke ampeso antes munchos anyos.

Kon el eskopo de alkansar a un orozo rezultado, muestra Munisipalidad esta mirando de kompletar los diversos lavoros de amijoreamyento. En el entervalo no esta neglijando de dar una grande importansa i a la publisidad, a azer byen konoser la sivdad, a la propaganda en una manera. Es kon esta perspektiva ke se avyo el sovredicho buro de Bruzelles, el “Sentro d’Estambol”. El Sentro tyene tambyen i el buto de apoyar, (i probavlemente) de akselerar (hızlandırmak) el prosesus de akseptansa de la Turkiya a la Unyon Evropea (A.B).

La inogurasyon del buro se realizo en el empesijo del enverano. Partisiparon el Prezidente de muestra Munisipalidad, el Sr. Kadir Topbaş, i el Sr. Olli Rehn, miembro de la Komisyon Evropea. Asigun syertos manaderos, la prezensya del Sr. Rehn tyene una importansa partikolar. El es kargado de la misyon de ancheamyento de la Unyon Evropea.

El Sentro de Bruxelles va ser un sentro de partejes resiprokos de ideales, de proyektos i de ideas... Un partaje entre Estambol aparejandose al 2010 i las otras kapitalas de la Evropa. Kon tyempo puede ser tambyen un ponte atando la Evropa i la Turkiya, o un dialogo amostrando ke ay valores komunas ke se deven revizar i partajar. Myentres la inogurasyon el Sr. Topbaş disho: “Este Sentro de Kultura i de Arte es un orgolyo para la sivdad de Estambol ke esto reprezentando yo, i tambyen para su povlasyon. En las selebrasyones de 2010 dezeamos vervos en muestra sivdad. El “Sentro d’Estambol” de Bruxelles va ser un sentro  de dialogo, de partaje i no una arena de fuertes diskusyones.”

En prensipyo el Sentro no deve tener o no tyene dinguna misyon diplomatika, syendo un sentro de Kultura i de Arte. Portanto el Sr. Rehn en su kurto diskorso toko a syertos puntos. Afirmo ke las aktividades del buro de Bruxelles no van a kedar limitadas kon el partaje de informasyones i de eksperyensas entre las administrasyones lokalas seya de Bruxelles, seya de las otras sivdades evropeas. En paralela se espera tambyen  adelantar las relasyones kon diferentes organizasyones o institusyones. Entre otras puedemos sitar la Komisyon Evropea, el Konsilyo Evropeo ansi ke el Parlamento Evropeo. Konsiderado de esta perspektiva, el “Sentro d’Estambol” tyene las shanses de djugar un grande rolo efikache i devenir un importante forum...

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
495