Batya Natan

La Reanimasyon Del Grupo Los Pasharos Sefaradis

La Reanimasyon Del Grupo Los Pasharos Sefaradis

Karen Gerson ŞARHON

Ya ay unos kuantos tiempos ke no vos damos haber del grupo Los Pasharos Sefaradis porke kada uno de mozotros estavamos muy okupados kon muestros echos i famiyas. I la verdad dizir, estavamos asperando a ke un grupo de mansevos tomen la bandiera de mozotros i kontinuen en la tradision de arekojer i prezervar muestra erensya muzikal. Malorozamente esto no afito i mozotros ke ya estuvimos lavorando estos 30 anyos para arekojer miles i miles de kantikas yene tenemos la karga de este lavoro grande en muestros ombros.

Este anyo pensimos ke seriya bueno de trokar el repertoryo entero i de azer un muevo kon kantikas muevas. Kuando mos vamos a dar konsertos la asistensia syempre kere oyir las kantikas preferadas suya ma no se renden kuento ke estas kantikas preferadas devinieron “preferadas” porke se auzaron a sintirmos kantar tantos anyos. Agora kuando mirash a la piyasa ke esta yena de CDs de kantikas judeo-espanyolas, todos los CDs tienen las mizmas kantikas. El repertoryo entero del mundo muzikal sefaradi esta tornando al rededor de 20 kantikas kuando tenemos miles i miles de kantikas en el baul! Siguro ke no todas pueden reushir en la shena ama entre tantas kantikas ay munchas mas ke 20 ke se pueden kantar kon gusto i ke pueden i eyas devenir “kantikar preferadas”.

Ya ay dos mezes ke mozotros los kuatro amigos de 30 anyos, İzzet Bana, Selim Hubeş, Yavuz Hubeş i yo (Karen Şarhon) estamos aziendo provas kada semana para renovelar muestro repertoryo. I desde ke desidimos de azer esto empesimos a resivir invitasiones para dar konsertos. El programa de muestro grupo para la primavera i el enverano sera el sigiente:

El 22 Marso: konserto para la Fundasion Aybay, en Taksim

El 7-8 Mayo: konserto para el kongreso de komidas ke va tener lugar en Kibris

El 15-20 Mayo: konserto para el Itahdut Yotsei Turkiya en Israel

El 19-22 Junyo: konserto para el festival de muzika djudiya en Geneve, Suisa

El 23 Julyo: konserto para la reunyon de Rodezlis en la isla de Rodes

Tenemos tambien 3 otros konsertos en Almanya, Austria i Sueda ke no se aklararon las datos.

Ya empesimos a tomar vitaminas kada diya i İzzet i yo bever leche kon miel para las bozes i para ke puedamos aktuar kon enerjiya en estos todos lugares. Ya no kero pronunsiar la palavra, ama ya no semos tanto mansevos komo eramos antes 30 anyos!

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
687