10 Temmuz 2020 Cuma 00:06

EL DIA DE LOS PADRES

Şeli GAON Judeo-Espanyol 3170 görüntüleme
24 Haziran 2020 Çarşamba

              El dia de los padres se fyesta el treser alhad del mez de junio.

Los padres son un monumento de sakrifisyo. Eyos abastesen a todos los menesteres de sus famiyas. Ser padre no es fasil, kale lavorar muncho para pueder reushir en la vida. Para ser un padre komo kale i azer respektarse por su famiya ay sinko reglas. Una de las bazas ke se deven enkulkar en la famiya es el respekto, ke de esto dependera ke un individuo se puede azer una persona buena en el futuro.

  • No kale abusar de la otoridad.
  • Kale sintir la opinyon de todos antes de meter una regla. Todos deven de dizir lo ke syenten. Despues ke se toma en konsiderasyon los pensamyentos de todos se puede meter la regla.
  • Kale olvidarse de los insultos. Los insultos tyenen munchas vezes grandes konsekuensas en los chikos.
  • Syempre kale ser djusto en dizyendo la verdad.
  • Syempre kale dar la konfiensya al den frente. Si un miembro de la famiya tyene un problem, kale sintirlo i topar una solusyon. Kale saver ke la konfiensa i el respekto son syempre endjuntos.

             Los padres no son perfektos. Es djusto ke kuando semos chikos vemos a muestros padres komo idolos. Eyos son el refleto de las personas ke keremos ver enfrente de mozotros, ma esta vizyon ke tenemos troka en la adolesensya i empesamos a ver sus errores.

Tenemos diferentes puntos de vista. Kale akseptar todo komo todo. Para la famiya un buen padre es: El ke manda a sus ijos a las mijores eskolas, el ke paga todos los kuentos, el ke yeva su famiya a lo manko una ves al anyo a las vakasyones, el ke lavora de la madrugada fina las medyas noches para abasteser a todos los menesteres… Se puede dizir ke es un padre ekselente.

Munchos ya savemos ke solamente las kozas materyales no  garantizan la valor i la kerensya de un padre. Ser un buen padre es saver ke la famiya es en primero, es estar allado de todos los miembros en la ora buena i mala, es un montante de aksyones ke no tyenen nada kon el materyalizmo.

Diferentes maneras de kerer bien: Todos tyenen diferentes maneras de mostrar sus kerensyas. Egzisten unos padres ke no pueden amostrar sus sintimyentos, sus emosyones, sus kerensyas. Ay otros ke son mas striktos, mas desinteresados. Ay de todo en este mundo.

Ay padres ke pensan ke sus ijos son unikos, spesyales, muy intelijentes i maraviyozos. Ay algunos padres ke se dedikan a sus echos, sus prioritades son de obtener la moneda para pueder mantener su mujer i sus ijos.

La famiya es el amor la mas grande ke egziste. Un buen padre desha todo lo ke esta azyendo para korrer a kaza i estar kon su famiya, el save ke su prioridad son eyos i ke es el uniko lugar i kompanyiya ke reelmente se syente en pas, es kontente i feliz.

El kere edukar kon valores, limites i reglas sus ijos. Los buenos padres ensenyan a sus ijos de ser buenas personas, a tratar al den frente kon respekto, amabilida i jenerosidad.

Unos padres syempre estan presentes allado de sus ijos, en las alegrias u tristezas. Estos son padres ke sienten i no djuzgan, son kapaches de dar la vida por sus famiyas.

Ser un buen padre es el ke es tolerente, pasyente i amorozo.

Todos los padres no pueden ser perfektos ma azen lo ke es lo mijor por sus famiyas.  

            

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR