İsak Eskinazi
Azer Bira, se saviya desde aze mas de 3 mil anyos. En las piramidas de Ejipto vemos figuras mostrando komo aziyan la Bira. En el kodigo de Hamurabi del siglo 18 antes de muestra era, se avla de la Bira. La Gresya antigua se ambezo la forma de azer la Bira de los Ejipsyos i trusho esta bevida a Evropa. En Judea, nombre del payis Djudyo de la antikuedad, el vino era preferido a la bira. Despues del egzilyo a Babilonya, los Djudyos tomaron la savor de la Bira i adoptaron esta bevida a la vida diarya. En el Talmud, al pareser, se avla de formas diferentes de Bira komo Bira de sevada (Pirzuma), Bira de Datile (shayhar), Bira de Igos (Taini). Se save ke la Bira fue una de las bevidas fermentadas ke el umano utilizo para satisfazer su ser.
La palavra Bira viene del Latino Bibere ke kere dizir Bever. En la Bira estamos akostumbrados de adjustar un poko de "Salto" (şerbetçi Otu) ke le da la savor atraktiva ke konosemos.
Muestros Padres mos disheron ke bever una bevida alkolika kon moderasyon da alegriya i keyf, ma bever kon "Goyim" (djente ke no son Djudyos) puedriya ser sekanozo. El Shulhan Aruh tanbien mos dize de no bever kon Goyim. Asta los anyos 1800, los Djudyos en Alemanya no puediyan fabrikar Bira, ama aziyan el trato del Salto ke es el produkto muy nesesaryo para fabrikar la Bira. Asta 1930, los Djudyos kontrolavan el 70% de la produksyon de esta planta. El Djudyo en jeneral beve en Noche Shabat, para resivir i para alegrar la Reyna Shabat.
En el siglo 18, kaji 80% de los Djudyos de Polonya lavoravan en esta industria i tanbien en aktividades de Tavernas. Aunke en los anyos 1800 los Djudyos fueron prohibidos de bivir kon el revinido de este ofisyo, munchos patrones kristyanos tenian maestros Djudyos para ke dirijgan este lavoro, porke los Djudyos tenian eksperiyensa desde munchos siglos. La famoza fiesta o el festival Aleman, ke se yama "Oktober Fest", kuando se beve Bira asta ke se enborachan a murir, fue inventada i organizada por mansevos Djudyos, para promosyonar la Bira. Tanbien los famozos djarros/kupas dekoradas, ke sirven para bever Bira, es una invensyon Djudiya. La famoza marka Lowenbrau fue konfiskada de la famiya djudiya Joseph Schulein, i su ijo muryo en el kampo de konsentrasyon Dachau.
Algunas markas famozas en los estados unidos, komo "Messiah", "Menne", "Jewbilation" son produksyones des Judyos.
Oy en Israel munchas Biras se azen kon las reseftas ke kedaron del siglo 4 i empleyan datile, granada, etrog para darles un pasto partikular de ekselensya.
Bever kon karar es saviduriya, elegansya i konosensya gastronomika.
Se dize ke un amigo se konose en los viajes, en djugos de kartas i mas i mas, en una meza de alegriya ande se toma bevienda alkolika.
Adaptado i adjustado del artikulo de Yvette Alt Miller
