9 Temmuz 2020 Perşembe 09:06

Shavuot

Şeli GAON Judeo-Espanyol 2489 görüntüleme Sesli Dinle
3 Haziran 2020 Çarşamba

          Shavuot en la lingua ebrea sinyifika "semanas". Despues de la sigunda noche de Pesah, el sinkuenten dia es la fyesta de Shavuot.

            Shavuot se selebra el sesh del mez de Sivan. Esta data es la rekolta de los produktos muevos de esta sezon. I este modo el puevlo de Israel yevava la  primera rekolta al 

Beth-Amikdash. En este dia santo se dyo los dyez komandamyentos en el monte de Sinay; i esto es una djura del puevlo djudyo ke van a konformarsen a estas reglas.

           Shavuot es una fyesta muy grande. A la salida del Ejipto, el Dyo Baruhu mos salvo del esklavaje. Ma dainda no eramos un puevlo kompleto. El buto de la Tora ke fue dada en el  monte de Sinay, era de formar un puevlo ke tyene sus leyes i sus derechos.

            Las ijikas vistidas de novya en las sinagogas sembolizan el kazamyento de los djudyos kon la Tora ke fue dada en Shavuot. Kerer byen la Tora es la proklamasyon del amor. Kuando mos aserkamos de la Tora deshamos todo modo de sentimyentos i penseryos de detras, i mos damos enteramente, mos konsakramos a la Tora.

            En esta fyesta alegre se kome dulsuryas de leche. La leche mantyene la persona, es el alimento prensipal del puerpo de la persona i la Tora es el alimento moral, espiritual de muestra alma.

            Mi madre, Zelda Natan z"l, me kontava  ke Shavuot en los anyos 1943-1947 se fyestava en la eskola Ben-Shemen en Israel kon muncha felisidad. Kada elevo, sus sestos en los ombros kon los produktos muevos de la primavera kantavan i baylavan en la guerta de la eskola ornada de rozas, frutas i los produktos muevos.

            En Shavuot se aze orasyones spesyales para fyestar komo un festival. La primera fyesta de este festival es Pesah, la sigunda Shavuot i la tresera es Sukot. Kada djudyo, seya ombre, mujer u kriyatura deve de asistir a las orasyones en esta fyesta emportante para oyir los dyez komandamyentos de la Tora, porke esto es la baza de la ley djudiya.

            En Shavuot se dekoran las kazas, las sinagogas i mizmo las Sefer Toras. Este uzo semboliza el lugar de los djudyos ke estavan asperando la Tora en el monte Sinay, estava yeno de vedruras, i de rozas golyendo al miskle. 

            Dyo kijo ke esta fyesta se selebre aryento de las ermozuras, kon alegriya i felisidad.

            El Dyo ke mos ayege para kada anyo kon todos djustos en muestro entorno, sin este virus mortal, kon pas i amor en el mundo entero.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR