3 Temmuz 2020 Cuma 13:30

LA ESKASURA

Eliz GATENYO Judeo-Espanyol 820 görüntüleme
3 Haziran 2020 Çarşamba

Teniyamos una vizina ke era muy muy eskasa. No era eskasa de provedad. Ya se pasava muy bueno ma era eskasa. Eskasura es una hazinura parese. Noche entera se asentavan kon un ampuliko para no emplear muncha elektrisidad. Las aguas ke lavava frutas o zarzavat, las arekojiya en un kuvo para echarlas a la tualet, para no emplear muncha agua. 

Siempre ke la viyamos, teniya un findjaniko en la mano. Kada diya se iva ande una vizina a demandar alguna koza ke le mankava. 

Un diya viniya ande mozotros a demandar un findjaniko de kafe, otro diya se iva ande otra a demandar un findjaniko de sal, otro diya se iva a demandar un findjaniko de arroz, o fideyikos, un limoniko, un gueviziko o otras kozas mas.

Vos dizere ke kuando tomava ansina de pokas kozas enprestado, aziya un jesto ke keriya pagar, ma dingunos no akseptavan la emprenda atras. I eya siguro muy kontente, no eskapava de demandar.

Esta mujer ya se aviya ido unas kuantas vezes ande la mizma vizina para demandar agro. I una vez ke era  puede ser la sinkena ves aharvo la puerta i le espandyo el findjaniko i le demando demuevo vinagre. “Aspera!” Le disho la vizina. Se fue aryentro, en lo ke torno teniya el bokal de vinagre en la mano, “Yo no empleyo muncho vinagre. Solo tu lo empleyates. Toma este bokaliko, merkas el muevo i me lo pagas.” 

De akel diya en delantre mas no demando alguna koza de dingunos.

Esto no es nada. Devera de aver munchos otros egzemplos ma vide uno ke paso al livro de Guinness.

El nombre de Hetty Green fue eskrito al  “Guinness livro de rekores” komo “La brusha de Wall Street” i la mujer la mas eskasa del mundo. 

Hetta nasyo en 1834 en Massachussets. A 6 anyos ampeso a meldar las gazetas de finans. Ansina fue ke kuando se engrandesyo, se izo eksper de transaksyones i izo una grande fortuna. Las paras ke le kedo de sus paryentes las djugo en la borsa i gano una fortuna de 200 milyones de dolares. 

Malgrado esto, esta mujer no teniya ni una kaza. Para no pagar dasyo de proprietad, bivio en las pansyones. Aya teniya su buro. Kada diya vistiya el mizmo fostan preto. I kuando el fostan se embatakava, lavava solo lo de abasho kon agua. No empleyava shavon porke iva kostar paras. No se merkava un fostan si el viejo no se arazgava. Kuando teniya 32 anyos desido de kazarse i se kazo kon un riko eskaso Edward Henry Green. Tuvieron un ijo i una ija. Edward muryo en 1902.  Sus ijos sufriyeron muncho de la eskasura de Hetty. No merkava lenya para kayentarsen en invyerno. Sus ijikos siempre vistiyan kozas aremendadas. El rezultado de la dezgrasya de su eskasura fue lo ke paso su ijo Ned.

Un diya se rompyo la pacha de Ned. En el espital le demandaron munchas paras, eya no aksepto i disho ke lo iva kurar eya. Ma malorozamente no la pudo kurar, la pacha se izo kangrena i los doktores se la kortaron. 

En 1916 Hetty muryo en deshando una grande fortuna, ke sus ijos se la gozaron. 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

HUKAT i BALAK

Mozotros Ailesi-İrvin MANDEL

Mozotros Ailesi-İrvin MANDEL

Tünelin Ucu-İzel ROZENTAL

Tünelin Ucu-İzel ROZENTAL