Salomon Aben Yaesh nasyo en 1520 en Portugal komo konverso, kon el nombre Alvaro Mendes. Gano la konfiensa de Joao III, Rey de Portugal i fue nominado “Shovalye”. En toda okazyon i en kada lugar defendyo los enteresos del Portugal kontra la Espanya. Probablamente seriya tambyen kon este eskopo ke vino a la Turkiya ande biviya Joseph Nasi myembro de su famiya.
Alvaro Mendes bivyo en diversos paises de la Evropa i tuvo relasyones estrechas kon los soverenos del oksidente. Entre otros, puedemos sitar Elizabeth I, Reyna de Ingleterra i Henri III, Rey de Fransia. La fortuna de Alvaro Mendes, su titolo de novleza adjustandosen a su profonda konosensya diplomatika, lo izyeron una figura muy importante en la Evropa del Siglo XVI. De sorte ke kada uno de sus aktos era segido kon entereso i atansyon.
Alvaro Mendes bivyo en la Evropa asta la edad de 65 anyos. En 1585 antes de emigrar a Estambol, se kedo un syerto tyempo en Salonika. Djuntos kon su famiya se konvertyo de muevo al Djudaismo i tomo el nombre de Salomon Aben Yaesh. El Oksidente todo en konosyendolo kon este muevo nombre, el anturaje diplomatiko kontinuo a yamarlo komo antes, Alvaro Mendes.
Akeya epoka, la Ingleterra i la Espanya estavan en una konkurensya kontinuala para ser el “Super Poder” de la Evropa. Efektivamente Elizabeth no kedo de ayudar la Olanda kontra la Espanya. Por siguro, en esta lucha de poder entre la Ingleterra i Espanya, la pozisyon del Otomano podriya ser muy importante i desiziva. Aben Yaesh fue probablamente uno de los ralos diplomatos evropeos a analizar este pleto entre los dos estados poderozos de la Evropa. Yaesh fue tambyen kapache de preveer i kalkolar las konsekuensas de la konkorensya.
Entonses, Aben Yaesh empleo toda su kapachidad diplomatika para estableser una unyon Anglo-Otomana en desfavor de la Espanya. Su profondo odyo kontra este pais fue komo un stimulante en sus esforsos por la realizasyon de su proyekto. En este buto, estuvo en kontakto kon el Palasyo Inglez. La Reyna Elizabeth I, en Marso 1591 mando al Sultan Murat III una letra en la kuala estava deklarando su apoyo a los pasos diplomatikos de Yaesh. Sovre esto, Aben Yaesh eskrivyo una letra de rengrasyamento a la Reyna.
Komo se esta vyendo, en los paises evropeos, el Imperyo Otomano no aviya reushido dayinda a estableser un network diplomatiko efikache kon sus propyo diplomatos. Myentres ke los djudios teniyan relasyones seya komersyal, seya familyal kon los paises del oksidente. Komo konsekuensa, un shifro importante de djudios fueron ansi de grande ayudo i efikachidad en la diplomasiya Otomana.
Despues de estableserse en Estambol, kon su rikeza i kapachidad travo la atansyon i gano la konfiyensa del Sultan Murat III, i despues del Sultan Mehmed III. Se le dyo la jerensya de las revenidas de las duanas, el titolo de Duk de Midilli i syertos kazales en el doredor de Tiberias en la Palestina.
Aben Yaesh muryo en Estambol en 1603. Tuvo dos ijos, Yaakov i Binyamin i una ija Hanna ke kontinuaron en el kamino de sus padres.
PS: esto lo eskrivi en 2009 i lo aktualizi en 2020. Por eskrivirlo me aprovechi en parte del lavoro “Türkiye Yahudileri” de Moshe Sevilla Sharon.
