Corona

No tenemos ganas de eskrivir sovre otros sujetos. De ande mos vino esta bela? I ke vamos azer? Esto es un kastigo de los sielos. El Santo Piyadozo ke mos guadre!

Eliz GATENYO Judeo-Espanyol
24 Mart 2020 Salı

Estamos enserrados en kaza, no estamos saliendo del todo a la kaye. Lo ke tenemos de menester, lo estamos komandando por telefon o por internet. Grasias ke moramos en Estambol, ke sin salir mos trayen a kaza todo lo ke keremos. En otros payises, esto no es posivle. Telefonamos al kasap, le enkomendamos la karne ke keremos i le rogamos “te rogo merkame i un pirishil i dos filas en viniendo” i el kon grande plazer mos traye todo lo ke keremos. Tanbien el bakkal i otros esnafes azen lo mizmo. 

Esta maldicha hazinura no tiene dinguna kura malorozamente. No ay nada de azer, sino ke lavar las manos i meter kolonya. Kada noche estamos oyendo a los doktores en la televizyon. En vezes mizmo los grandes profesores no estan entre eyos dakordo. I esto es muy normal por ke este maldicho virus aparte ke no es konosido de los sientifikos, troka de natura asigun la persona ke enfekto. De sorte ke no ay un tratamiento fikso para todos.

Estan diziendo ke los aedados estan mas frajiles i por esto estan rekomendando ke esten leshos de sus ijos i inyetos i estan defendyendolos de salir de kaza.

Keridos amigos, no savesh ke kadar me esto espantando. Me esta viniendo komo ke ay una nuve preta en los sielos. Justo komo vimos en el filmo de “Moshe Rabenu”. La noche kuando todos estavan en sus kazas, aviyan abashado nuves pretas i aviya ampesado un ayre azyendo un bruyido de espantar. Era el ayre de la muerte ke aviya saltado las kazas de los judios i aviya trayido la muerte a los Egipsyanos.  Agora ke estamos serka de Pesah me viene al tino esta shena. Ma esta ves este ayre no viene solo a Egypto i no salta las kazas ma viene a todas las partes del mundo i entra a todas las kazas.

En la estorya de la umanidad uvo fina agora munchas epidemiyas de karakter mundial ke las yamaron pandemiyas. En  el 14en siglo kon la landre o la pesta uvo mas de 100 milyones de muertos. En 1918, la grip Espanyola kavzo en el mundo i mizmo en Estanbol miles i miles de piedritas. La Kolera, el Tifüs, el Virus Ebola, el AIDS, la virguela, el Polio, el Sars i mas, son las grandes pandemias ke mos akodramos.

Las bushkidas de milizina i vaksinas ya ampesaron ma va tomar muncho tiempo fina ke van a ser realizadas.

Devemos de ser rekonosientes a los doktores i a todo el personal medikal ke i eyos estan en perikolo ke malgrado esto estan lavorando kon devuamiento.

Arogaremos de tener la bendisyon del Sinyor Del Mundo.

Esto eskapando en dizyendovos ke Rav Nafi Haleva mos esta rekomendado de meldar kada diya el Tehilim no. 130 para pueder eskaparmos de esta gezera kon sanedad. Amen!

 

 

Siz de yorumunuzu yapın

Tüm Yorumları Görün