29 Mart 2020 Pazar 19:04

EL SYETEN DIA Internasyonal del Ladino

Şeli GAON Judeo-Espanyol 2103 görüntüleme
19 Şubat 2020 Çarşamba

16.02.2020 Alhad se fyesto “El Syeten Dia Internasyonal del Ladino” en la eskola djudiya “Ulus Musevi Lisesi”. Fue un dia muy fruktuozo ke sureyo de las onze de la demanyana fina las sesh de la noche. 400 personas asistyeron a este dia kultural todo en Ladino. Las avlas enstruktivas, los djugos, el konsierto i el teatro muzikal.

En primero “Marie Christine Varol” mos konto las “Konsejas i Konsejos del Baul” i los “Proverbos sovre las Eshuegras” ke estavan muy enteresantes.

Amigos Para Sympre

 

Despues, “Suzet Herman”, “Anna Eskenazi” i “Şeli Gaon” prezentaron una parodia de “Los djugos de ayer i oy”. “Anna Eskenazi”  izo una avla para dar una idea jeneral de lo ke vamos a avlar i meter en shena.  “Şeli Gaon” disho ke va azer una nostaljiya en komparando los djugos de antes 50 anyos ke djugavamos en las kayes, i los djugos modernos de oy ke se estan djugando en el ordenador i otras makinas teknolojikas. Despues eya konto los djugos modernos ke se estan djugando en el Ipad i en el telefon. Los sujetos de los djugos todo matansinas, gerrear, armadas, kompetisyones i futbol. El entereso de los mansevos sovre la violensya, la ambisyon de obtenir todo lo ke tyene el den frente… “Suzet Herman” la grande Star, konto los djugos ke se djugavan antes 50 anyos en las kayes, kon todos los ijikos i ijikas de la maalle ande moravamos. Kon su savrozor, su avla kayente i su umor izo riyir a todos. Eya konto los rekuerdos ke bivyo en su manseves en raporto kon estos djugos.

“Anna Eskenazi” se degizo en forma de una ijika de tresera klasa kon su uniforma, la prostela preta i la yaka blanka komo mos ivamos mozotros a las eskolas, los kaveyikos kon dos fyongos blankos, las kalsas kon dantela al bodre i en la mano el sefertasi i la chanta de komer djusto komo una elevika luzya. Kuando entro a la shena yamando los nombres de sus amigos, kon una pyedra blanka para djugar “Seksek”, la assistensya empeso a aplodisar porke “Anna” es una aktrisa formidable.

“Anna i Şeli” djugaron endjuntos los djugos: Seksek, Bilyas, Topaç, Voleybol, Saklambaç i Saltar Kuedra”. Entremientes “Suzet” kontinuo a kontar sus rekuerdos apropriados a estos djugos, kon su madre, granmama, vizinos i los amigos ke teniya ande morava.

“Lili Değerli” avlo sovre el sujeto “Kerer es Pueder”. “Eliz Gatenyo” konto “Un Malentendido” ke le paso por su kavesa antes anyos. 

A las una i medya todos koryeron para el  komer de midi. Mizmo las kumidas eran sefaradis. Ispinaka kon avikas, köftes de prasa, bulemika de berendjena, arroz i halva de bimbriyo.

Despues de midi fue el konsierto de las “Estreyikas d’Estambol”. Una maraviya de ver todos estos chikos avlando i kantando en ladino i en ebreo komo los grandes. Este konsierto tuvo lugar porke era el kinzen anyo de la fundasyon de este grupo kon el chef , “İzzet Bana” ke peno i lazdro tantos anyos kon estos ijikos. Munchas felisitasyones a “İzzet Bana”.

Kuando se termino el konsierto uvo el gute. Kafe, chay, borrekas i otras kozas de komer.

A la fin el Teatro “Los Rekuerdos” ke todos estavan asperando kon grande despasensya.

“Forti Barokas” eskrivyo esta piesa i en mizmo tyempo es la metyo en la shena. “Ferit Koen” es el direktor. “Ceyda Pirali” se okupo de la muzika. “Rina Muraben” es la koreograf.

Toda las artistas i artistos djugaron komo profesyonales. Dinguna diferensya. Se puede dizir ke fue en la savor de un muzikal kon las danses i la muzika perfekta. El sujeto “Los Rekuerdos” fue muy bien kontado i djugado por Forti i su ekipa. Los kero remersyar de aryento mi korason a todos ke lavoraron por este muzikal.

El syeten Dia Enternasyol del Ladino fue un dia yeno de aktivitades i muy reushido.

“Silvyo Ovadya” kon “Karen Şarhon” fueron los pilares de este dia. Todos lavoraron muncho para esta organizasyon.

El Dio ke mos ayege para kada anyo mijorado, amen ve amen…

 

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

Tünelin Ucu-İzel ROZENTAL

Tünelin Ucu-İzel ROZENTAL

Mozotros Ailesi-İrvin MANDEL

Mozotros Ailesi-İrvin MANDEL

Vizyondakiler

Vizyondakiler