Sovre Mi

Judeo-Espanyol
22 Ocak 2020 Çarşamba

Kenan Cruz Çilli

 

Agora ke ya enviyi unos kuantos artikolos a Şalom, desidi ke esta semana seriya bueno eskrivir un pokito sovre mi i sovre ken yo so para ke vozotros, los meldadores keridos del Jurnal, me konosash mijor. Yo nasi en Londra en el anyo 1998. Mi mama portugeza katolika (z’’l) i mi papa turko muzulmano se konosieron ayi i bivieron i lavoravon ayi munchos anyos. Kuando tuve solo dos anyikos, eyos dieron karar de venir a Turkiya i de establesersen en la sivdad de Antalya. En Antalya yo empesi mis estudyos en una eskola enternasyonal i desde una edad muy chika las linguas fueron entre mis sujetos favoritos. En kaza avlavamos siempre portugez, turko i inglez afilu algunas vezes karishtereando todas las tres en una sola fraza. Yo se ke mi entereso en las linguas vyen de mi madre kerida ke lavoro komo traduktora i avlava un monton de linguas perfektamente.

En la eskola enternasyonal en akeyos tyempos aviya munchos elevos de Israel. Entonses kuando me estava engrandesiendo, teniyamos vizinos i amigos israelianos kon ken dainda tenemos muncho kontakto. Klaro ke en estos anyos tambyen tuve muncho kontakto kon la kultura djudaika i la lingua ebrea. Endjuntos kon mis amigos i vizinos siyempre selebravamos fiestas de kada relijion. En 2016, yo desidi kontinuar mis estudyos en Olanda ande empesi a ambezar en la Universidad de Leiden. Ayi ize estudyos enternasyonales i estudyos del medyo oriente. Finalmente en la universidad tuve la oportunidad de ambezar ebreo i arabe en una manera mas formal, i siyempre tuve el grande mazal de tener profesores maraviyozos kon ken pasi unos tres anyos muy espesyales en Olanda.

En muestro tersero anyo de la universidad, teniyamos un semestre en ke podiyamos eskojer azer un interkambiyo. Klaro ke yo eskoji pasar un semestre en Yerushalayim ande podria pratikar mis linguas i tambiyen deskuvrir kozas muevas en kada diya. Entonses tambiyen meldi en la Universidad Ebrea de Yerushalayim i ayi tuve munchas i munchas eksperiyensyas ke tambiyen kero kompartir kon vozotros en el futuro. Eskapi mis estudyos el enverano pasado i agora esto pasando un anyo de deskanso i estos diyas esto esperando resultados de unas universidades por mi titulo de master. 

Mi istoriya kon el jurnal Şalom empeso algunos anyos atras. Kuando era elevo en el lise. Asta este tyempo no saviya muncho sovre la komunidad djudia de Turkiya porke mis kontaktos kon el djudaismo syempre fueron kon la kultura israeliana i mis amigos de Israel. Kuando empesi a ambezar mas sovre la kultura de los Sefaradis mi entereso se engrandesyo i desde 2015 so meldador de Şalom.

La parte ke me plaziyo mas en el Şalom fue la pajina en Djudeo-Espanyol i tambyen El Amaneser. Despues de meldar un pokito de Djudeo-Espanyol de vez en kuando por unos kuantos anyos, desidi finalmente de tambiyen embiyar un artikolo. Grasyas a Karen Şarhon, tuve la oportunidad de kontribuir a este jurnal espesyal en una lingua ke realmente me plaze muncho. Antes de eskapar tambiyen keriya dedikar este artikolo a mi madre (z’’l), ke malorozamente peryimos en el anyo pasado.

Se ke seriya muy orguyosa de mi. Vos sueto a todos una semana buena, es syempre un plazer para mi meldar vuestros artikolos!

Siz de yorumunuzu yapın

Tüm Yorumları Görün