El anyo muevo en la antikuedad

El anyo muevo en la antikuedad

İsak Eskinazi

 

Kuando los Djudyos fueron egzilados a Babel, ayi enkontraron una fiesta ke se yamava Akitu. Esta fiesta se selebrava en el Anyo Muevo. La fiesta empesava el primer dia del mez de Nissannu i durava 12 dias. Este primer  dia korespondiya kon el ekinoks de la primavera ke es el 21 de Marso del kalendaryo de oy. En siertos kazales de Mezopotamya, esta fiesta se selebrava i en Nissan i en Tishri, ke era el ekinoks del otonyo.

En esta fiesta de Akitu, el Rey de Babilonya enkavesava la fiesta i esto era el empesijo de un siklo annual. El muevo anyo korrespondiya teorikamente kon el empesijo del universo i del Kosmos. Esta fiesta empesava de la Puerta de Ishtar (el nombre de Ester viene de esta diosa). Una chika parte de los restos de esta puerta estan en el Muzeo Arkeolojiko de Estanbol, i una  muy grande parte en el Muzeo de Pergamon en Berlin). La fiesta se terminava en el Templo de Akitu. Kuando el Rey Assireus (Cyrus) konkisto Babilonya, esta fiesta mas no fue selebrada.

El anyo muevo en Misrayim empesava kuando las luvyas de Etyopya kavzavan las inondasyones del Nilo ke yenavan de aluvyones la kama del rio ke aziya bivir Ayifto. Los Ejipsyos tenian un senyal fikso. Kuando la estreya Sirius se perdiya de Vista i aparesiya de muevo 70 diyas despues, esto era el empesijo del anyo muevo i azyendosen bien borrachos, selebravan kon alegria el muevo anyo. Esta data korespondiya mas o menos a los Medianos del mez de Julio. Si las inondasyones del Nilo eran pokas, aviya ambre, ama si eran demazyadas kavzavan destruksyones.

Lo ke es interesante, es ke el kalendaryo de Ejipto dize ke estamos agora en el anyo 6259 del empesijo del mundo. Esto muestra poka diferensya kon el kalendaryo muestro ke dize ke estamos en el anyo 5780 desde el empesijo del mundo. Solo no olvidar ke los Ejipsyos izyeron este kalendaryo no komo el muestro, en el sistema lunar, ama lo izyeron kon el sistema solar, tomando en konsiderasyon ke el mundo da vuelta al rededor del sol i esto en 365 diyas. Disheron ke estos 365 diyas se komponen de 12 mezes i kada uno de estos 12 mezes tienen 30 diyas. Los 5 diyas adisyonales formavan un otro mez ke se yamava “el mez kurto”. Por esto no kontaron 13 mezes ma 12 mezes. Este kalendaryo se esta utilizando solamente por los Koptos, en sus iglesias.

Los Romanos empesaron a selebrar el anyo muevo en el mez de Marso. Eyos adoravan al Dio Janus, ke keria dizir, “Puerta” i ke tiene 2 karas. Una kara  mirava a la derecha i la otra a la siedra. Esto simbolizava el empesijo i la fin. En el anyo 153 (AEK- antes de la era komun), el Senato desidyo ke el anyo devriya de empesar el primer diya del mez de Janus o Janvier. Sezar izo una modifikasyon al kalendaryo i por esto se yama “el kalendaryo Julien”. Mas despues un papa, ke se yamava Gregorio, en el anyo 1582 izo una  otra modifikasyon, i asi el kalendaryo fue yamado “kalendaryo Gregoryano”.

Oy en diya, pokos payizes komo Iran, Afganistan, Etyopya, Nepal, Saudia Arabia kontinuan  kon sus propriyos kalendaryos.

Segun la famoza Sumerologa, Muazzez İlmiye Çiğ, en los Turkos antes de ser Musulmanes, la selebrasyon de anyo muevo era ansi: el syelo era divino, el diya i la notche se peleyavan. Komo el 21 de Disembre era el diya mas kurto i la noche mas larga del anyo, aziyan selebrasyones  utilizando una rama de pino ke la yamavan “AKÇAM” o “El Pino Blanko” i metiyan regalitos debasho de esta rama de pino, atando kozikas a la rama pora ke trayga el Syelo Buendad al Mundo. La Sinyora Çığ tambien dize ke el “Papa Noel” es una figura Turka porke las vestimyentas del Papa Noel paresen muncho a los ke se vistiyan los Turkos de Asya Santral i ke esta figura entro en la tradisyon oksidantal a traves de los Hunos.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın