Kenan Cruz Çilli
Oy vos kero kontar sovre una sivdad chika ke ya vijiti munchas vezes durante mi vida, la sivdad medieval de Trancoso en el norte de Portugal. Komo ya savesh, en todo Portugal se topan kazales i sivdades kon istoryas djudia-sefaradis muy rikas. Ma una grande konsantrasyon de estos lugares se topa en el norte del payis serka la frontiera kon Espanya, una de las frontieras mas viejas en el mundo ke kaji no kambyo muncho dezde el anyo 1297. Trancoso es konosido en Portugal i en el mundo komo un punto importante de la istorya sefaradi achakes de la abundansya de erensiya djudia en la sivdad. Kuando el edikto de Alhambra fue deklarado en 1492, munchos djudios empesaron a fuirsen a Portugal komo refujiados i munchos djudios yegaron a Trancoso en este periyodo porke ya se topava aya una komunidad grande i afluente de djudios dezde los siglos 12 i 13. Ma komo ya savesh, despues de solo kuatro anyos el rey de Portugal tambyen deklaro la ekspulsyon de los djudios de Portugal en 1496.
Trancoso se topa muy serka del kazal de mi granpapa i por esto es una sivdad ke vijiti munchas vezes djunto kon mi famiya durante los enveranos de mi chikez. Trancoso es una sivdad muy ermoza, protejada por murayas medievales alrededor, i un grande kastilyo ke oy es un lugar turistiko. Komo una sivdad medieval, Trancoso konserva munchas de sus tradisyones istorikas i en los enveranos aun se organiza un festival medieval donde se gizan komidas tradisyonales, i muncha djente se viste vistidos istorikos komo en los filmos i dizis. Visitantes a Trancoso tambyen pueden gozarsen del atmosfer kalmo i ermozo en uno de los kafes o restaurantes en las kayes prinsipales o en una de las plazas istorikas. Ma munchos visitantes tambyen vyenen asta Trancoso por ver su erensiya djudia ki asta oy se puede ver klaramente en munchos puntos de la sivdad. Por egzemplo, en la fasada de uno de los edifisyos mas famozos en la sivdad se topa una ventana kon una menora grande de vidriyo.
En otra fasada de un edifisyo medieval ay varios simbolos djudios komo el Leon de Juda i las puertas de Yerushalayim. En 2012, despues de mas de 500 anyos, un kal ermozo i moderno fue avierto en Trancoso kon un muzeo djudio chiko en su lado. Aki los visitantes pueden ambezar sovre la istorya de los djudios de Trancoso i los detalyes sovre las viktimas de la enkizisyon ke kontinuo por munchos anyos. La sinagoga fue fraguada en la parte de la sivdad ke antiguamente era la juderiya (la rejion de la sivdad donde biviyan los djudios). Oy la sinagoga ke se yama “Mayim Hayim” es utilizada solamente kuando grupos de turistos djudios vienen a Trancoso de payizes komo Israel o Brazil, o de la kapital Lisboa. Yo penso ke vale la pena para kualker turisto ke se va a Portugal por kualkera razon de vijitar lugares mankos konosidos. Kaji todos vijitan las sivdades grandes komo Lisboa i Porto, o las plajes luzyas en el sur del payis, ma tambyen ay munchos lugares chikos i mankos visitados ke vos pueden interesar. En espesyal los lugares de istorya sefaradi komo Trancoso.
