kanada REklam

Las Lentejas Del Onkl Izak

Las Lentejas Del Onkl Izak

La madre de mi esfuegra Lea, teniya un ermano muncho mas grande de eya ke se yamava Izak.  Izak era el mas grande de los 5 ermanos i era muy seriozo. Todos lo respektavan. Estos ermanos, se engrandesyeron, estudiaron i kada uno tomo un kamino diferente. Ken se fue a lavorar, ken se kazo, ken se fue a otro payis, komo los arondjo el ayre de la vida.

El onkl Izak se izo direktor de la sosiedad “Wagons Lits”. La ermanika Lea era la mas chika de los ermanos. La kazaron kon entrevista, kon un mansevo ke era el shefe de la gar de Dedeağaç (agora Aleksandropolis). Eyos ampesaron a morar en el lojman ke se topava en el kat de ariva de la estasyon de treno. Lea i su marido tuvieron 3 ijos i una ija (mi esfuegra). Agora la estasyon de treno se topa kaje en medyo de la sivdad, ma akel tiempo era leshos de las moradas.

En los anyos 1920, salidos muevos de la Primera Gerra Mondiala, no aviya muncho eskojer kualo de gizar.

Un diya Lea aviya gizado lentejas. Una kaldera yena de lentejas muy savrozas, ke plaziya a todas sus kriyaturas. Despues ke ya eskaparon de komer, ya se estavan aparejando a echarsen, ensupito oyeron ke estavan aharvando a la puerta. Atyo!  Ken sera?  Eyos ke miraron por la ventana, ke ven? El ermano grande de Lea, Izak. Komo era el direktor de “Wagons Lits”, estava azyendo enspeksyon, i a esta okazyon vino a verlos i pasar la nochada ande eyos.

Lea i toda la famiya estavan muy orozos ke el ermano grande aviya vinido a vijitarlos. Estavan orozos ma tanbien estavan chekineyandosen muncho de este ombre seriozo. Un poko despues disho Izak ke teniya ambre. Una soflama grande… Aksilik grande, por ke eya ya saviya ke a Izak no le plaziyan lentejas del todo. Espantandose Lea disho ke malorozamente lo ke teniya era solo lentejas. Izak disho: Kualo? Solo lentejas tienes?  No saves ke yo no komo del todo lentejas? No tienes otra koza de komer? Lea disho ke estas oras no puede topar nada de gizar por ke ya aviyan serrado todos los magazenes i tanbien estavan muy leshos de la sivdad, en medyo del kampo.

No aviya hayre, el onkl Izak kaliya ke komyera las lentejas por ke no iva pueder durmir noche entera de la ambre. Peki! Le disho a la ermana. Dame veremos un chini de lentejas! Lea le incho el chini de lentejas. Izak tomo una kuchara, gosto, despues otra una kuchara… No estava negro del todo! Le plazyo. Kon la ambre ke teniya lo alimpyo el chini entero. No se aviya artado dainda. Kon el ayre seriozo ke teniya, disho: Lea! dame veremos otro un chini de estas lentejas tuyas.

Siempre ke komemos lentejas, mos akodramos de este evenimyento ke mos aviya kontado mi esfuegra dbm.

 

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın