La Edukasyon De Los Kriyos EN LA ANTIKUEDAD (2)

Judeo-Espanyol
13 Kasım 2019 Çarşamba

İsak Eskinazi

Komo puerpo ensenyante aviya tres kategoriyas:

 (1) ‘Grammatistas’ ensenyavan komo avlar korektamente en biervos i en la gramer, (2) ‘Kitharistas’ ke ensenyavan la muzika, (3) i los ‘Paidotribes’ ke ensenyavan la kultura fizika.

A parte de estas ensenyansas, los maestros davan klases de aritmetik, de literatura i de etika. (Moral)

Los Kitharistas ensenyavan los instrumentos de musika komo la ‘Lira’ (kaji arpa chika) o el “chuflete” ke era la Flauta.

La kultura fizika era obligatoria i los djugos komo la ‘Lucha’ (güreş) se aziyan en la Palestra (los salones de spor de agora). Esta edukasyon bazika, para los ijos, se eskapava a los 14/16 anyos.

Las famiyas mas rikas permetiyan a los ijos de irsen a la eskola segundarya anda se ambezavan la Retorika, ke es la siensia de avlar bien, de topar la palavra korekta, de saver konversar. Estas famiyas puediyan pagar a los filozofos sofistos ke eran mas karos ke los otros ke davan klases i lesones partikulares.

Los ijos a la fin de los estudiyos, a la edad de 18 anyos, devian de azer el servisyo militar ke era obligatoryo.

En la epoka de Platon i de Aristo, estos jovenes se ivan sea a la  ‘Akademia’ de Platon sea al ‘Lyceum’ (lise) de Aristo.

En Mezopotamya la mentalidad era differente. Antes de todo, los ijos eran la garansiya de la viejes de los paryentes.  El padre teniya una otoridad absoluta sovre los ijos. El puediya vender sus ijos komo esklavos, o darlos a otra famiya komo guerfanos. Aun ke esto, tener un ijo era muy importante i aviya ke azer loores a los Dios, azer kaparas para ke naskan i ke se engrandeskan kon sanedad i la kostumbre era de darles los nombres de los nonos o nonas. (Komo era muestra kostumbre asta aze pokos anyos).

Si no aviya parto, el ombre puediya tener una segunda espoza. Ama todo esto estava regulado kon leyes. Dar una edukasyon al ijo apartenesiya solo a las famiyas rikas. Las eskolas en los Sumerios se yamavan “La Kaza de Tavliya”. (Tavliya/Tablet).  La eskola devia de estar al lado del Templo. Los elevos tenian solo 3 diyas de deskanso en un mez, i 3 diyas mas de deskanso por los diyas de fiestas.

Las eskolas ensenyavan no solo las profesyones de los rikos, ma tanbien matematika, gramer, jeografiya, botanika i zoolojiya. Ama lo mas importante era de saver eskrivir en las tavlias. Para eskrivir en tavlias devian de ambezarselo desde sus chikes, kuando eran ninyos.

Al pareser, no trokaron munchas kozas en la teknika de ensenyar i de ambezar durante 4000 anyos. Solo ke en muestros diyas kon las kompudadoras, kreyo ke  todo va tomar un muevo kamino kon la rapides de un lamparo.

 

 

Siz de yorumunuzu yapın

Tüm Yorumları Görün