La Fiesta Ke Pasimos: Sukkot

La Fiesta Ke Pasimos: Sukkot

La fiesta de Sukkot empesa el 15 de Tishri i es el sinken diya despues de Yom Kippur. Sukkot es una tranzision de las mas seriozas fiestas a la mas alegres. A las vezes, esta fiesta, la yaman Zeman Simhatenu (Sezon de Alegriya). El biervo Sukkot sinyifika ‘kabinas’, ke es la Sukka ande kale bivir siete diyas.

Komo Pesah i Shavuot, Sukkot tiene dos sinyifikasyones: istoriko i agrikultural. Esta fiesta komemora la epoka de kuarenta anyos kuando los judyos kaminaron en el dezierto, i estuvieron biviendo en refujios ke toparon. Sukkot es en mezmo tiempo la fiesta de arekojer los produktos agrikulturales.

Para onorar muestros padres ke bivieron en refujios en el dezierto, en esta fiesta, los judyos deven de bivir siete diyas en las sukkas ke konstruyen. Una sukka deve de tener tres paredes, kon una kuvierta enriva ke no se bole en el ayre, i deve de ser bastante grande para ke la famiya entera pueda bivir siete diyas ariento. La sukka se puede dekorar kon produktos agrikulturales.

En los siete diyas de Sukkot, los judyos tienen un orden divino de ser alegre. Todos keremos siempre ser alegre i bivir orozos, ma komo?

Komo los savios dizen: ‘Si no estas kontente kon lo ke tienes, nunka vas a ser kontente kon lo ke vas a obtener’.

Es verdad ke devemos de tener siempre objektivos en la vida. En los negosios, este objektivo, es de ganar mas munchas paras. La biblia dize: ‘La persona ke kere muncho las paras, nunka se va artar de ganar’.

Todos keremos bivir orozos, ma munchas vezes mos yerramos en pensando ke la reushita mos va azer mas orozos. ‘Reushir es alkansar a lo ke keres, ser orozo es ser kontente kon lo ke tienes’.

El riko es el ke se kontenta de lo ke tiene. La persona no se arta de ganar. No ay fin de kerer. Siempre puedemos alkansar mas muncho de lo ke tenemos, ma fin asta kuando? Kuando vamos a tener tiempo de tomar plazer kon lo ke tenemos?

Bivir siete diyas en una Sukka modesta kon una meza i siyas de plastik!  Esto es el mas grande mesaje de Sukkot: ‘La persona puede ser oroza mezmo kon muy pokas kozas’.

 

 

 

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın