29 Mayıs 2020 Cuma 07:21

Bodrum

Forti BAROKAS Judeo-Espanyol 1287 görüntüleme
28 Ağustos 2019 Çarşamba

Munchas amigas me yaman demode porke los enveranos no me vo a Bodrum ni a Çeşme. Mi ijo ya kanso de yamarme.

“Ven mama, desha esta ada ke esta yena de arabos; ven mos vamos a ir a kaminar; te va yevar a una beach muy ermoza.”

Ayde dishe me azere moderna, me ire a Bodrum a la kaza de mi ijo el grande, lo veyo a mi inyetiziko ke ya me eskarinyi.

Tomi el bilyeto de avion, apareji la validja, abashi a la eskala para tomar el motor para Kartal. Una djentorya, neysa ya me suvi al motor, abashi en Kartal tomi un taxi para ir al aeropuerto Sabiha Gökçen. Abasha la validja, pasa por la seguridad, alevanta la validja, pasa por el polis, el avion iva partir a las oras 12, izo retar, se alevanto a las 13. Neysa ya abashi a Bodrum. Sali afuera, mi ijiko me estava asperando, mos suvimos a la araba una ora de kamino para ir a su kaza. Yo de vista travi fotos, las meti al facebook i al instagram  ke veyan ke ya esto en Bodrum i ya so moderna.

 Apenas arivimos a kaza mi ijo desido de yevarme a una plaj ke es muy popular.

“Ijo de la madre, ya esta kuatro, amanyana mos vamos.”

“Mozos mos vamos estas oras, demanyana es muy kayente.”

Bueno no lo rompere… Ayde suvete a la araba, la araba esta buyendo, avyo la klima se izo buz ya me entezi, tashideya mayos, tovajas, antojos i durbin de mar, karuchas, pishkados aunflados ke van a djugar en la mar kon el chiko, una ora de kamino, oh ya arivimos a la plaj. Mis amigas me disheron vate a tala plaj te vas a dezmayar de la ermozura ke es, yo me dezmayi en pagando un tost kon un ayran 55 liras.

A la noche me disho mi ijo ke mos vamos a ir a komer pishkado a un restoran ke no ay sigundo ande se puesta el sol. Yo ya kero kama i echarme ma no ay remedyo kale uydear. Ayde suvete a la araba una ora de kamino, ya arivimos, komimos pishkado muy ermozo, el sunset maraviya el kuento 4 personas 700TL. Atyo este sunset ya lo veyo kada tadre de la Heybeliada i debaldes.

A la otra demanyana  mi inyeto me disho:

“Haydi babaanne, havuza iniyoruz”.

Es posivle ke le va dizir no? Ayde abashimos un buen yokushiko, ya arivimos a la pisina, eyos estan saltando i djugando en la pisina, yo esto pensando komo va suvir a kaza. Despues de midi, abashimos 120 eskalones para ir a la plaj del site. Una mar lokura, no se kere dicho, a la torna kuando vinimos a kaza bezi la mezuza.

Me iva kedar 15 diyas. A la otra demanyana troki el bilyeto de avion. 4 diyas ya me abasto de ser moderna. Estar endjuntos kon los ijos, kon el inyeto muy ermozo, ke la gozen la kaza, ke esten alegres, sanos i rezyos i a mi la Büyükada ke no me manke!

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR