kanada REklam

El diya valentino I Tu B’av

El diya valentino I Tu B’av

El diya del Santo Valentino empeso en la epoka del Imperio Romano. Debasho del governo del Emperor Claudio II, uvo munchas gerras i matansinas. Claudio el Kruelo tuvo munchas difikultades para unir los soldados i embiyarlos a las gerras. Claudio se penso ke los ombres no se kerian ir a gerreyar porke eyos no keriyan espartirsen de sus mujeres o de sus namoradas. Komo rezultado, Claudio kito una ley mueva diziendo ke no va aver mas dingun kazamiento o espozorio en Roma.

En la mezma epoka, aviya un papaz en Roma ke se yamava Santo Valentino. Santo Valentino estava azyendo los kazamyentos de los mansevos en sekreto. Ma malorozamente, su sekreto fue deskuvrido i Santo Valentino fue asasinado.

El diya ke Santo Valentino fue asasinado, era el 14 Febrero del anyo 270. El mezmo diya, antes de ir a la muerte, Santo Valentino desho una letra a la ija del gardian ke le aviya ayudado en la prizion. En esta nota, Valentino lo remersio por su ayuda i por su amistad, i debasho de la letra eskrivyo una nota “El amor de tu Valentino”.

Esta nota empeso el kostumbre de embiyar mesajes de amor en el diya de Santo Valentino. Kada anyo en este diya, todos se akodran de este evenemyento i se embiyan mesajes de amor, poemas i regalos de parte a parte. Este evenemiento amostro ke “el amor nunka puede ser vensido”.

Tu B’Av, el kinze del mez Agosto, es “el diya del amor” en Israel. Este diya es un diya de fiesta antigua i moderna. En la epoka del Segundo Templo, Tu B’Av era nombrado komo un diya de alegriya, i en akel diya, las mansevas se vistiyan fostanes blankos, i baylavan en las vinyas para topar novyos. Este diya empeso a fiestarse de muevo en el estado moderno de Israel, en los anyos dalkavo.

En la Mishna, Raban Shimon ben Gamliel esta diziendo ke “No ay mijor diya por el puevlo de Israel ke el kinze del Av i el diya de Kipur”.

Tu B’Av, komo las otras fiestas judias, empesa la noche del kinze del mez, ke es la noche de la luna yena, en el kalendario lunar. En las kulturas antiguas, la noche de la luna yena se viya komo una noche konveniente por la romansa, el amor i la fertilidad.

En los anyos dalkavo, en esta noche se apareja festivales de kantes i bayles en Israel. Los mansevos i las mansevas se visten de blanko, i la fiestan kon alegriya. Ma, este diya no es un diya de konje; es un diya de lavoro. Esta fiesta no es una fiesta relijioza komo las otras fiestas.

Tu B’Av es solo un kostumbre kedado de las kulturas antiguas, i akeya noche se selebra kon alegriya i kon amor en el estado de Israel.

 

 

 

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın