kanada REklam

En Yerushalayim se enstalo un jenerator de agua de bever

De diya en diya, esta mas difisil de topar agua de bever. Mas de dos milyones de personas en el mundo, no tyenen agua limpya para bever.

En Yerushalayim se enstalo un jenerator de agua de bever

En payizes de la Afrika, topar agua de bever esta kostando muncho i esta tomando muncho tiempo. Kada diya, las mujeres piedrendo oras i oras para arekojer agua. Las  posibilidades de topar agua limpya se estan aminguando de diya en diya. En el futuro, las gerras no se van a ser por petrol, ma se van a azer para topar agua de bever.

En los diyas pasados, se enstalo un jenerator de agua en el muro oksidental en Yerushalayim. Esto es una makina ke krea agua del ayre. La makina toma el ayre del alrededor i lo transforma en agua de bever. Se puede obtener agua yelada o agua tivya. Ademas, esta agua tiene todos los minerales nesesarios por la persona i puede servir 2500 personas al diya.

Ya savemos ke los soldados en una gerra no pueden sobrebivir sin agua. Agua es la sola koza vital. Una de las preokupasyones de los shefes militarios es garantizar ke las fuentes de agua esten siempre koryendo.

Una kompanyiya israelyana kreo esta makina para garantizar ke las personas topen agua de bever en kualsiker lugar i en kualsiker momento.

Water-Gen, bazado en Rishon Lezion, Israel, es espesializado en teknolojiyas de jenerasyon i en tratamyento de agua. Su teknolojiya rezerva la agua de la umididad del ayre i la transforma en agua de bever.

El sistema lavora en filtrando el ayre para ke la agua se pueda rezervar i arekojer. La agua se yela i se purifika para ke se pueda bever. Esta agua se puede bever de una fuente enstalada en la makina.

El direktor de la kompaniya Arye Kohavi, esta dizyendo ke el transporte de agua es una de las mayores razones de la salida de konvoyes de Afganistan. Estos konvoyes, lo mas, estan atakados. Si se puede produzir la agua en el punto ke se tiene menester, no va aver mas menester de transportar agua i se va aminguar el risko de atakas i mas no va aver tantos gastes.

Segun Water-Gen, esta makina ke se puede montar en vehikulos, produse 10-20 galones (40-80 litros) de agua de bever al diya. Este sistema, ke fonksyona kon la enerjiya solar o elektrika, se va pueder empleyar no solo en las seksyones militarias, ma en mezmo tiempo, en payizes ande es difisil de topar agua limpya.

Ademas, no va aver mas menester de ridomas de plastik para arekojer agua. Todos van a pueder bever agua de la fuente de esta makina el punto ke tienen menester. La agua se va pueder produsir mezmo en paizes de ekstremas kalores.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın