11 Temmuz 2020 Cumartesi 10:37

El Dia de las Madres

Şeli GAON Judeo-Espanyol 1515 görüntüleme
29 Mayıs 2019 Çarşamba

Antes dos semanas selebrimos el dia de las madres kon muestras famiyas; maridos, ijas, ijos, nonas i nonos. Mizmo ke ya paso tyempo kije eskrivir mis sintimyentos sovre este dia.

Este dia presyozo, estimado por todo el mundo, empeso a selebrarse en 1907, grasyas a una manseva ke se yamava Anna Jarvis, ke aviya peryido a su madre en su chikes. Kada anyo; el sigundo alhad del mez de Mayo, se selebra el Dia de las Madres. En la Turkiya empeso a fyestarse en el anyo 1955.

MADRE! El byervo, la nosyon primordyal de muestra egzistensya...

Muestra responsabilita es, ke para alivyanar, para fasilitar la vida de muestras madres, no es solo kuando tyenen menester de mozotros ke seyamos al lado de eyas, ma syempre las kereremos byen i koryeremos para resolver sus problemes.

Las madres son el simbolo de la kerensya sin asperar nada del den frente, del devuamyento sin fin; eyas son las egzistensyas sakras, bendichas ke sus lugares no se pueden inchir  nunka kon kualker koza.

Empesando del dia del nasimyento, eyas korren a todo i se okupan de una parte kon la sanedad fizika i psikolojika de las kreaturas, azen un esforso spesyal para pueder aparejar sus ijos al futuro para ke seyan utiles i provechozos a la umanidad.

Las madres son la baza de las komunidades en engrandesyendo, en edukando i kultivando los individuos sanos i kon buenas intuisyones.

Eyas estan toda la vida al lado de mozotros tanto en los momentos los mas orozos de muestra vida tanto en los momentos los mas difisiles.

Todas las madres son una roza. Eyas kon sus eksperiensas aklaran, arrelumbran muestros kaminos; eyas mos ambezan a kerer byen, el mundo, las personas i la vida; eyas aseguran muestra mirada al futuro kon esperansa i kon konfiensa.

En la sirkulasyon de la vida el lavoro, la parnasa, el koryer, el asigo, estan tomando el lugar de muestros serkanos; i ansina la emportansa de estos dias espesyales esta pujando.

Yo penso ke la kerensya i la fidelidad ke no estamos puedyendo amostrar en esta sirkulasyon de la vida, lo estamos mostrando en estos dias privados. Dingunos no mos puedemos olvidar de muestras madres.

A este sujeto vos kero kontar una konseja ke aviya meldado en una revista.

-Un tyempo aviya una kriatura ke se estava aparejando para vinir al mundo.

- Un dia le demando al Dio.

- Dio mio, me disheron ke me van a embiyar al mundo amanyana. Ma yo so tan chiko i sin fuersa; komo va bivir aya?

- El Dio le respondyo. Entre todos los Andjelos yo eskoji uno para ti. Eya te va asperar i te va tomar debasho de sus alas i te va protejar. Tu Andjelo te va kontar kada dia konsejas i te va sonreir. Ansina tu vas a ver ke te esta keryendo byen i vas a ser orozo.

- Bueno, kuando me van a avlar, komo no se sus linguas, komo va entender?

- Tu andjelo te va dizir las mas ermozas i dulses palavras ke puedes sintir en el mundo. Te va embezar a avlar, kon muncha atansyon i kerensya.

- Bueno, yo, si kero avlar kon ti, kualo va azer?

- Tu andjelo te va embezar a orasyonar en avyendo las manos.

- Me ambezi ke ay munchas personas negras en el mundo. Ken me va protejar de lo negro?

- Tu andjelo te va protejar al koste de su vida.

- Ma yo esto muy triste porke no te va ver otruna vez.

- Tu andjelo te va avlar de mi kontinualmente i te va embezar komo me vas a alkansar.

  La kriatura le demando la kestyon de alkavo.

- Agora me esto aparejando para ir al mundo. Kualo es el nombre de mi Andjelo?

- Kerido mio no es emportante el nombre de tu Andjelo. Tu la vas a yamar “MADRE”.

Keridos lektores, esto felisitando a todas las madres este dia sakro. El Dyo ke mos ayege para kada anyo kon muestras madres endjuntos

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR